Читать книгу Звездный дар. Сборник стихов / Урмала савгъат - - Страница 21

Балас, дигIянти сихIру

Лерти сари шягIирла,

КабикIу нурла чури

Буребала тIярхъила.

ЛутIа ризкьила камра

МицIирбиру къаркъара,

Излумас дарман дирар

Сунна гIядатла гъайра.

ШягIирли дикьути сар

Галгубала цIумъала,

Бухънабала балгнира

Урунжла далуйтира.

ШягIирла ца хIерлира

Чебиу челябкьлара,

Шакиркур се бурулил

Сунези гъайхIеадра.

Чедиан сай лерилра,

Урла анцIбукьлумира,

Дала хIебурадлира

Гьарилла пикрумира.

Илала карцIила цIакь

ГIуррара халаси саб,

ХIял агарсилис кумек

ГIеббаахъес виран сай.

ХIебалас ил чи саял,

Адам саял, идбагал,

Амма иличи карцIли

Сай дунъяла гьар адам.

ГIямрула къантIти дусми

ХIялалли дуркIани сай,

УрхIлис зарал агарли

ХIеркайэсра балан сай.

Шаладикайчи балгна

Адамтас лукIани сай,

«Ухен назмула чирагъ!»

ВикIули улгани сай.

Ухен, мабилшад вари

Чирагъ рухIла, назмула —

Рулгули гьарил шягIир

Нура гIевурцан сарра.