Читать книгу Звездный дар. Сборник стихов / Урмала савгъат - - Страница 3

Гумайла къаркъубачи

Кайили сай ца ухъна,

ХIергъули цархIилтала

Аурсин сайра къаркъа.

Дархибти шяхIрумани

Далхахъи сари дяхIра,

Шявдиуб хIулбазирад

КIантIкадикIар нургъбира.

Багьесли саб, анцIкьила

ЦIали верцIибсиван сай,

КIидехI дургъбала бикьри

Къаркъа ветаурсин сай.

Сунела гIязиз дурхIни

Ахиратлизиб саби,

Сунечи кьанбируси

БебкIалис ургъули сай.

Буркьбиубси къабтайчир

Орденти ухули сар,

Гъабзадешла гьунартас

Дургъбазир сархибти сар.

Урцуйзирад дарибти

Ярагъла хIяз биранти,

ДурхIнара асар биру

Гумайлавси ухъначи.

Гумай бацIбухъунхIелра

Ухънацун кайили сай,

Убяхъибси гIяйсачил

Се сарил лукIули сай.

ГIярабла хатIли делкIи

Ванзализи къел-хIерзи,

ГIямрула дурсрачила

Сари марли хIисабти.

Ил дигIяндеш чисалра

Гьаргбирар мурт – биалра,

ЛехIдешла гIякьлуми сар

Къаркъа аурси ухънала.