Читать книгу Звездный дар. Сборник стихов / Урмала савгъат - - Страница 15

Чархлизиб ва хIилизиб

Палакатдеш леб набзиб,

Иличила чизилра

Багьахъес хIейгулира.

Чегьурли читла хIева

БекIличи гулмендира,

Се чебиисал дураб

Нура дурарулхъулра.

Янилис ахир агу,

ХIерлира ну хIебличи.

Гьанаруливан сари

Булбултала далуйти.

Дигайла пикрумани

Асар барили набчи,

БархIехъуназир гIурра

ЛукIулра назмуртани.

Дила улкьайла дурар

ДяхIурбала бекIни сар,

Гьарахъларти дубурта

КьапIни чекадиили сар.

УркIила улкьай-унза

Кьяли-кьяйчи гьаргли сар,

Дигайлис даг делкIунти

Гъяркайулра кагъурти.

Гьанна дила пикруми

ЦархIилти журала сар,

Илдачила далуйти

УркIилар лукьули сар.

Чархлизиб ва хIилизиб

Палкатдеш кали саб,

Илдачила сеналра

ХIебурисра чизилра.

Чегьурли читла хIева,

БекIличи гулмендира.

Нура дурарулхъасра

Аркьяс хIулби хIердикIна.