Читать книгу Звездный дар. Сборник стихов / Урмала савгъат - - Страница 25

Савлила муэртазир

Чедиира дурхIядеш,

Рисира чардиубли

ГIурра гаши, цIуръадеш.

Рисира, хIебалули

Се гIяйиб лебсил набчиб,

Се багьандан гIязабти

ГIурра тикрардирутил.

ДугIла жаниварливан

Дурар гIямру дуркIулра,

Убай нешла зулмурти

Секьяйда гьандурцутил.

«Неш!» или – чIярванбяхъиб

Мякьлав усул уршили,

Балусиван сунна неш

ГIязабтази рикили.

Баркабан ил девли ну

Чераргъахъира хапли,

ГIямрула мягIнализи

Чаррухъахъунра мурхьли.

Неш ибси сагал ули

Давла хиб дила хъули,

Мабиаб дунъяличиб

Ил дев хIебашул хъали.

ИлхIейчирад неш или

Дугьадизур вавнира,

Нешличиван хIердизур

Набчи зак-зубартира.

Наб неш бикIусин бизур

Дила дурхъал ванзара,

Неш или дугьабизур

Иш зягIипси дунъяра.

Неш ибси девли лерил

ДацIахъаб хIярхIубира,

Неш ибси девли лебил

ТIашааб бургъантира.

Неш ибси дурхъал девли

Балбушаб иш дунъяра,

Неш ибси девли гьарил

Верцахъаб убкIусира.