Читать книгу Звездный дар. Сборник стихов / Урмала савгъат - - Страница 29

Келекла багьси бурям

БухIнабухъи урхьнази,

Ругертала айгъирти

Дуракаиб абзлизи.

ЦIуба гъалкьамабачил

Кадерхур абзанази,

Чемпионти детхIеур

Ил гъазала абзлизир.

Цалис гIергъи, кIиибил,

Ругерти дуцIли сари,

Дубаначи даили

Илар дубкIули сари.

Чегили къаркъубачи

БутIначи шурдулхъулра,

Ругертала айгъирти

АлкIули сар кIинайсра.

Урхьула хьанцIа майдан

ДуцIбарили гIуррара,

Чузирад детарули

Сари цIуба тIулкмира.

Агь, ругерти, регурти

Урехи хIебалути,

БебкIали касадалра

ГIурра алкIес диранти.

Лугира хIушала цIакь

АкIубла хIял агартас,

Кайсахъира хъярхъдешра

Урехи хIебалантас.

Амма бебкIаагардеш

Лугира гIяхIти гъубзнас,

Дунъяла дяхI дарсдарес

АкIубла къайгъназибтас.