Читать книгу Три белых камня. Сборник стихов / Æртæ урс дуры - - Страница 25

О мæ хорз нана, мæ зынты

Æз дæу фæмысын ныр дæр.

Кувын æз, нана: мæ фынты

Ды куы фæзынис уæддæр.

Курын: ракæн та мын аргъау,

Ратт мын цин æмæ æнцой,

Уадз, сызгъæрин бонтæ маргъау

Ног нæ дыргъдонмæ тæхой.

Уадз, бæгъатыримæ стæры

Æз мæ рог сæнтты цæуон;

Фенон, не знæгты куыд тæры

Дард нæ уæзæгæй нæртон.

Радзур ды мæнæн, куыд сæтты

Раст зылыны тых æдзух, —

Фенон Уазы къуыппыл зæдты,

Фенон Поты фæзы дугъ.

Уадз, дæ зонд æмæ дæ дзырдæй

Дуне срæсугъд уа мæнæн;

Уадз, æрбайрох уой дæ фыртæй

Катай, рыст æмæ ингæн.