Читать книгу Ирон фæндыр - Коста Хетагуров - Страница 13

Фæндараст!.. Фервæзтæ нæ мæтæй —

Хуыцауы мацæмæй уал дом! —

Мæрдты дын хай уыдзæн дзæнæтæй,

Уæлæуыл баззайдзæн дæ ном.

Лæппуйæ базæрондмæ царддæ

Мæстджынæй адæмы мæстæй;

Æхсæв цырагъдарæй фæхаттæ

Хæларæй, уарзонæй, рæстæй…

Дæ мадау бауарзтай нæ бæстæ,

Фæцыддæ мæгуыртæн фыййау…

Цæмæй дын фиддзыстæм дæ хæрзтæ,

Цæмæй дын раддзыстæм æгъдау?!.

Фыдæй фыртмæ нæ уд, нæ зæрдæ

Дæ рухсæн хъардзыстæм, бæргæ,

Фæлæ та сагъæссаг нæ сæртæ,

Дæ фæстæ чи баззад кæугæ!..