Читать книгу Ирон фæндыр - Коста Хетагуров - Страница 20

Халон баргъæвст сындзыл.

Уад тымыгъ хæссы…

Сау айнæджы рындзыл

Нарыхъæу хуыссы…

Даргъ æхсæв фыдбонæй

Цардудæн хуыздæр…

Рухс цæуы кæронæй, —

Бадынц ма кæмдæр…

Иу зæронд ыскъæты, —

'Гас хъæуы уæлдай,

Аззади фæсфæды

Ацы бæстыхай, —

Ма дис кæ йæ бадтыл! —

Цуайнаджы уæлхъус

Архайы йæ артыл

Иу саударæг ус.

Артдзæсты кæрæтты,

Фæныкмæ æнгом

Бадынц сывæллæттæ, —

Чи бæгънæг, чи гом…

Уазал æмæ стонгæй

Бирæгъ дæр тæрсы, —

Удхæссæг æввонгæй

Ахæмты хæссы…

– Ма кæут, мæ хуртæ, —

Дзуры цæм сæ мад, —

Афыцой хъæдуртæ…

Абадут æнцад!..

Митæйдзаг æхсæлы

Мары фæздæгæй…

Цæстысыг ызгъæлы

Агмæ сусæгæй…

Хъуырмæ схæддзæ хъарæг:

«Дудгæ фæбада

Зæйы бын нæ дарæг,

Мах чи фæсайдта!..

Фондзæй уæ ныууагъта

Иу ныййарæгæн, —

Мады зæрдæ скъахта, —

Царæфтыд фæдæн!..

Зондæй мыл фæтых дæ,

О, мæ лæджы хай, —

Сидзæртæй фæлыгътæ

Ингæнмæ тæргай!..

Буц хъæбул дæм дзуры, —

Сфæлмæцыд йæ мад, —

Махæн дæр дæ цуры

Сцæттæ кæ бынат!»

Цæстысыг ызгъæлы

Агмæ сусæгæй…

Митæйдзаг æхсæлы

Мары фæздæгæй…

Бафæллад кæуынæй

Бинонты кæстæр, —

Къонайыл æрфынæй

Адæмы хуыздæр!

Иууылдæр дæ адыл

Тулдзысты, фæлæу! —

Стонг æмæ фæлладыл

Тых хуыссæг кæм нæу!..

– О. гытци кæд уыдзæн?

Райс-ма, цæй, дæ аг!..

– Абадут!.. Фæуыдзæн

Алкæй дæр йæ фаг…

Аг кæлы йæ былтæй, —

«Хъæдуртæ» фыцынц…

Алы ран тымбылтæй

Сидзæртæ хуыссынц…

Стонг æмæ кæуынæй

Лæг куы сфæлмæцы,

Тарф у уæд йæ фынæй, —

Маст æм нал хъуысы.

Лыстæнмæ цæ хаста

Мад йæ хъæбулты,

Æдæрсгæ цæ нуæрста

Алы бызгъуырты…

Скодта цæ рæбынæй,

Дæлфæдтæм æрбадт…

Гъай-да-гъа! Кæуынæй

Нал æфсæст сæ мад!..

Сидзæртæн хъæдуртæ

Се 'хсæвæр хуыдта,

Афтæмæй цын дуртæ

Цуайнаджы фыхта:

Афыцын æфсоны

Байрох уа сæ хæрд…

Стонг æмгъуыд нæ зоны,

Иу сайд ын æгъгъæд!..