Читать книгу Ирон фæндыр - Коста Хетагуров - Страница 2

Мæ удылхæцæг

Æнæ æнцой уа,

Мæ мады зæнæг

Мæ мардыл кæуа!

Куыд зæхмæдзыд дæн,

Куыд фыдуаг хæссын, —

Мæ фыдæн фыртæн

Цæуылнæ бæззын?

Хъæубæстæй – хъоды,

Æмгартимæ – сырд,

Ныхасы – гоби, —

Нæ мæ хауы дзырд.

Мæ зонд, мæ фæндыл

Нæ лæууы кæстæр,

Кæстæр мæ фæдыл

Нæ цæуы хæстмæ.

Бæсты сæрвæлтау

Нæ кæлы мæ туг;

Хæссын, къæлæтау,

Цагъайраджы дуг!..