Читать книгу 'n Uur van lig - Nina Smit - Страница 85

17 Maart – God weet van jou swaarkry

17 MAART

Lees: Psalm 56

God weet van jou swaarkry

Die dag as ek bang word, vertrou ek net op U … My ellende het nie ongemerk by U verbygegaan nie, U het op my trane gelet. In u boek staan hulle opgeteken. – Psalm 56:4, 9

Soos so baie kere tevore gaan die psalmdigter by God hulp soek as dit met hom sleg gaan. En in hierdie psalm maak hy ’n wonderlike ontdekking: God weet reeds van sy swaarkry, Hy het selfs elkeen van sy trane in ’n boek opgeteken! Om hierdie rede is hy nie bang nie, maar vertrou hy op God om dinge vir hom weer beter te maak.

Daar kan nooit ’n ramp met jou gebeur waarvan God nie bewus is nie. Hy ken jou deur en deur, Hy weet álles van jou: of jy sit en of jy opstaan, of jy reis en of jy oorbly. Hy weet van elke woord wat jy gaan sê – Hy weet selfs wat jy dínk!

Daarom mag jy die voorbeeld van die psalmdigter volg en op God vertrou as jy bang is. Meer nog, God beloof dat Hy die oorsaak van jou ellende sal wegneem en ’n einde aan jou trane sal maak: “Wie met trane saai, sal die oes met gejuig inbring. Al loop hy en huil terwyl hy die saaisak dra, hy kom juigend terug terwyl hy sy gerwe dra,” beloof Psalm 126:5–6. Ook al verdwyn jou swaarkry nie terwyl jy nog op aarde is nie, het jy die belofte in Openbaring 7:17 dat die Lam jou herder sal wees en jou na die fonteine met die water van die lewe sal lei, waar God ééndag al die trane van jou oë sal afdroog.

Here God, ek neem U nou op u woord dat U van al my trane weet en elkeen van hulle op u eie tyd sal afdroog. Baie dankie daarvoor! Amen.