Читать книгу Änfach frei laafe geloss - Josef Peil - Страница 12

Eich kann Pl@tt

Was meine Computer alles kann, es is nitt ze sahn. Eich kann dem änfach sahn, was er schreiwe soll, unn de micht das dann tatsächlich – unn merstens richtich. Uff hochdeutsch. Das kann er, unn das kann eich. Uff englisch gäng’s aach. Das kann er sogar bisje besser wie eich. Was er nitt kann is platt. Do versteht er kä Woort.

Was er dofor wiere kann, is mer helfe, mit der Welt hout zerecht ze komme. Dofor muss eich das @ kenne. Honn eich geler’t. Unn nou kann eich platt unn kann @. Zesamme: Eich kann Pl@tt. Meine Computer kann nor @. – Sin eich also doch noch e bisje schlauer.

Do fillt mer in: Schwobe mache im Fernseh Werbung, se könnte alles – außer hochdeutsch. Se wolle domit sahn, was for schlaue Leut se doch wäre. Awer verstehn dene ehr Computer dann aach schwäbisch? Meiner jedenfalls kann das nitt. Unn das leit bestimmt nitt do draan, dass eich dene uff em Hunsrück kaaft honn. Meine Computer is kä Schwob unn is kä Hunsrücker.

Awer das müsst doch ze mache sin, dass eich dem aach noch beibrenge, dass er ganz stolz schreiwe kann, wenn eich’s em sahn: »Eich sinn en Hunsrücker« unn »Eich kann Pl@tt«.

Dann kann eich mer aach Werbung im Fernseh vorstelle, so ähnlich wie die Schwobe, awer am wichtigste Punkt ganz anners: Mer sinn Hunsrücker, mer könne alles, hochdeutsch sowieso, das kann doch jeder. Was awer nitt jeder kann: Mer könne aach Pl@tt.