Читать книгу Änfach frei laafe geloss - Josef Peil - Страница 16

Fortschritt

In de Geschiecht lo spiele mit

de Peter, de Pitter unn de Pit

De Pit konnt reime unn hot Fassenachtsvorträäch geschrieb, wo de Pere dann vorgetrahn hot.

De Pitter hatt en Au uff die Leit, was die so gemach honn unn was dene so passeert is. Er hot gere gelacht, am liebste iewer annere Leit. Unn er hot dem Pit gesaht, iewer wene unn was er schreiwe soll.

De Peter hot gere vun sich gesaht, er wär vun Natur aus faul. Do driewer honn dann Leit gelacht, weil se jo doch gesiehn honn, wie de Peter schaffe konnt. Manichmoh honn se awer aach de Kopp geschierelt: Uff was for Idee de kimmt.

Mit äner is er dem Pitter besonners uffgefall. Dem Peter seine Hup war geteert, unn domols hot samsdaachs de Hup gekehrt were müsse, ob Dreck do war ore nitt. Vun alters her war das so gewes: Samsdaachs nummedaachs weerd gekehrt unn samsdaachs omends gebaad.

Nou war newer’m Peter seinem Hup en Bitz. Die Keersche, Quetsche unn Beere honn die Besitzer selwer ge-ernt, unn mit de Holzäppel konnt käner ebbes aanfänge. De Peter hatt gar nix vun de Bitz. Das häßt, im Herebst harr-er schun ebbes. Es Laab, unn das nitt so wenich.

Do war aach samsdaachs Kehre bei weirem nitt genuch. Unn wer schun emoh versucht hot, Laab mit dem Besem ze kehre, kann wohl nohfühle, dass dem Peter das nitt de allergrößte Spaß gemach hot. Beson­ners lustich is es wor, wenn aach noch die Luft gang is, die hot dem Peter es Laab schön uff en Haaf vor die Hausdeer geblos, do awer kräftich gedrinnelt unn dann wiere iewer de ganze Hup vertält. Unn harr-er dann trotzdem de Hup sauer krieht, spätestens de nächste Daach hot’s wiere ganz genau so ausgesiehn.

Wer will’s dem Peter verdenke, dass er do noh Miehlichkäte geguckt hot. Die Bääm abmache wär ä Miehlichkät gewes. Awer aach wenn se sein gewes wäre, de Peter hätt se stehn geloss. Nou war de Peter äner, wo so manche Handwerker arm gemach hot. Er hot immer de-erst emoh geguckt, ob er nitt passend Weerkzeich findt, dass er’s selwer mache könnt, eh’b er äner komme geloss hot. »Wenn ich Werkzeich honn, kann ich mache«, horr-er immer gesaht, wenn sei Fraa geschennt hot: »For was brauchst de dann das schun wiere?«

Änes Daachs harr-er gefunn, was er for das Laab gebrauche konnt: en Staubsauger for die Bosselstuh. Ganz praktisch mit eme lange Schlauch unn uff Rolle. Domit konnt er es Laab beim Fliehe in der Luft erwische. Ruckzuck war de Hup gekehrt. »De hot se doch nitt all, wenn er fertich is, lehr-er aach noch Teppichborem uff de Hup«, hot de Pitter räsoneert, unn de Pit hot sich das for die nächst Büttered noteert. De Pere wusst, wie er betone musst, dass die Leit ganz genau wusste, an wieler Stell se lache musste. »Der Peter saugt seinen Hof so fein, doch die Steine, die wollen nicht rein.« Se honn sich krumm unn schibbelich gelacht.

De Peter selwer hot aach im Saal gehuckt. Unn was horr-er gemach? Mitgelacht, unn im nächste Herebst de Staubsauger wiere genomm. Außerdem war das Ding jo aach suns beim Bossele gut ze brauche.

In de nächst Fassenacht war das Laab sauge schun kä Witz meh wert.

Es hot e paar Johr gedauert, uff ämoh hot’s extra Laubsauger genn, wo nitt nor sauge, nä, aach blose konnte. »Häst de das als Patent aangemeldt«, hot die Fraa gemänt, »was könnst de weile Geld mache.« Ruckzuck war das More unn se harre all äne.

Ja, unn de Pitter? De lacht seitdem die Leit aus, wo es Laab mit dem Reche scherre. »Lumpekrämer, honn noch nitt emoh Geld for en Laabsauger.« Nor de Pit schreibt kä Fassenachtsvorträäch meh, seitdem se de Pere selwer moh ausgelacht harre.

So honn sich die Zeite geännert. Fortschritt is doch, wenn sich ebbes ännert. Gelle?!