Читать книгу Соһуччу көрсүһүү - - Страница 3

Күһүн. Оскуоланы бүтэрэн баран сопхуоска окко үлэлии сылдьабыт. От мөлтөх буолан, биһиги звенобутун Ньурба аттыгар Куочайга лэбин охсуутугар ыыттылар. Урут манна хара маһыттан уулаах этэ. Ону мелиорациялар түһэрэн ходуһа сирэ оҥорбуттара. Урут өссө оскуолалаах обургу дэриэбинэ үһү. Билигин туох да суох. Бастакы сылларга уу түспүтүн кэннэ лэбин бөҕө үүммүтэ. Кус кэмэ буолан, бары саалаахпыт. Ходуһаҕа киирдэхпитинэ хаас кэлиэ диэн, саабытын сүгэ сылдьабыт.

Арай биирдэ сарсыарда от охсо киирэн иһэн, кустар көппүттэригэр ыппытым, биир кус табыллан ойуур иһин диэки түстэ. Эбиэккэ баран иһэн көрдүөм диэн, бара да сылдьыбатым. Ол оннугар түспүт сирин бэлиэтии көрдүм. Эбиэккэ тахсыы буолла. Мин куспун көрдүү бардым. Ойуура чачархай соҕус эбит, өлбүт кус көстүөх курдук. Кус түспүт сирин төһө да чуолкайдык көрдөрбүн, олох булбатым. Дьонум кэтэһэ сатаан баран үөгүлээн ыҥырдылар. Бу диэки түспүт буолуохтаах, тыыннаах да буоллаҕына ырааппата ини диэн, мастар төрдүлэрин барытын хастым. Ол туран мастар төбөлөрүнэн сирдэтэн көрбүтүм, куһум мас ачааҕар моонньуттан ыйанан бу турар эбит.