Читать книгу Marie und ihre Abenteuer - Marion Kinzig - Страница 12

DR ROTE BLITZ

D'Erwachsene saga uns Kender immer, mir solla net schtreita. Und was macha se selber?

I han zu Pfingschta an Roller kriagt. An rota Roller, mit ma Fähnle dra am hintera Schutzblech und ra großa und extralauta Klingel. I bin damit sauschnell in dr Schul und wieder dahoim. "Wie dr Blitz", sagt mei Mama. Klasse Name für mein Roller, han I denkt: dr rote Blitz!

Mei Oma hot aber glei 's Kommando führa wolla: "Des Mädle kosch doch net mit dem Roller in d'Schul fahra lassa", hot se zu meiner Mutter gmoint, "des isch doch viel zu gfährlich!"

Mei Mama hot da Kopf gschüttelt. "Mr muss de Kender ebbes zutraua, Irmgard, sonscht lerna se net mit de Gfahra umzugeha. Du woisch ganz genau, dass I dr Marie sowieso scho elles zeigt han und dass mir die Schtreck mehrfach zsamma ganga sin. Sie isch da Weg doch au scho alloi glaufa. Irmgard, du willsch scho wieder neischwätza, des goht oifach net." Mei Oma hot nix mehr gsagt. Sie hot sich umdreht und isch davoganga. I glaub, d'Oma war schwer beleidigt. Aber mei Mama war au schtenksauer. Do isch dr Wurm drin, in dem Verhältnis von denne boide.

Im Anschluss an des Schtreitgeschpräch, zwischa meiner Oma und meiner Mama, hot mei Mama au a Ausschprach mit meim Vadder ghet. In dr Küch, nach 'm Abendessa, noch am selba Abend. Des han I mitkriagt. Was meine Eltern betrifft, kriag I sowieso fascht elles mit. I muss halt Obacht geba, wenn die sich ohne mi in dr Küch unterhalta. D'Erwachsene denka immer, mir Kender däta nix höra oder des elles net verschteha. Na ja, manchmol verschteh I des wirklich net, warum die sich schtreita. Aber wenn se oim von selber nix verzähla, no muss mr halt hälenga mithorcha. Auf jeda Fall hot mei Mama meim Papa sehr deutlich gsagt, dass se die Eimischerei von meiner Oma satthot und dass se von ihm erwartet, dass er sich deswega mol mit seiner Mutter unterhält. Leider han I die Antwort von meim Papa net verschteha könna. Der hot bedeutend leiser gschprocha.

Mei Mama isch im übriga wega dera Rollersach deshalb so sauer, weil 's kurz nach meiner Eischulung scho mol so an ähnlicha Krach geba hot. Do isch 's au drum ganga, wie I in d'Schul komm.

Glei am Abend von meim erschta Schultag han I zu meiner Mutter nämlich gsagt ghet, dass I koi Baby mehr sei und dass I deswega alloi in d'Schul und au wieder hoimlaufa will. "Des derfsch du", hot mei Mutter gsagt. "Es isch ja net weit. Und du musch bloß oimol über d'Schtroß. Aber mir gehn des zuerscht a paarmol zsamma. Und pass auf: Du musch mir hoch und heilig verschprecha, dass du immer achtgibsch auf d'Autos. Und über d'Schtroß gehsch du mir nur über da Zebraschtreifa. Isch des klar? Koine Fisimatenta, hosch ghört, du Wildfang?" Logisch war des klar. Und no war dr Kittel gflickt.

Mei Oma isch aber au scho damals net so recht eiverschtanda gwesa mit meiner Selbschtändigkeit. An dem Tag, als I des erschte Mol selber zur Schul han laufa dürfa, hot mi a Überraschung am Schultor erwartet. Do isch se nämlich gschtanda, d'Oma, und hot auf mi gwartet, um mi hoimzubegleita. I han 's erscht gar net glauba wolla, aber 's war wirklich so. I han a Wut kriagt sondersgleichen. I han gschria, dass I alloi laufa derf und dass I koi Baby mehr bin und bin hoimgrannt. Mei Oma isch gar net so schnell hinterherkomma. Dahoim hot 's no an Mordsschtreit geba zwischa dr Oma und dr Mama. Der war net weniger laut wie mei Gschrei. Weil mei Mama hot net gwusst, dass mei Oma mi abhola kommt und war sauer und hot dr Oma ganz schee da Roscht radoa. "Des Mädla ko des und wie kommsch du dazu, di oifach in mei Erziehung eizumischa. Du kosch doch net oifach hälenga zur Schul geha, obwohl du woisch, dass I dr Marie erlaubt han, dass sie alloi hoimlaufa derf. I ko 's net fassa", hot se zur Oma gsagt. D'Oma hot gschriea, dass se 's doch bloß gut gmoint hätt und sie hätt halt Angscht ghet und auf dr Schtroß sei 's halt so gfährlich und so weiter und so fort. Am Schluss hot d'Oma nachgeba. Aber dr Haussega zwischa meiner Oma und meiner Mama isch a Zeitlang sehr schief ghanga.

So isch des gwesa mit dera Schtreiterei zu meim Schulafang.

Aber jetzt verzähl I weiter von meim Roller: I fahr natürlich net nur in d'Schul damit. Mit so ma Roller ko mr ganz viel verschiedene Wegla fahra. Glei nachdem I mein 'rota Blitz' kriagt han, bin I nüber zur Renate donnert und ihr hot der Roller au saugut gfalla. Mir könna uns jetzt übrigens au wieder außerhalb von dr Schul treffa. 's isch Gras über d'Sach mit dera Küsserei gwachsa. Au wenn ihr Mutter mi immer no mit so ma bissle misstrauische Blick aguckt, wenn se mir d'Tür aufmacht. Auf jeda Fall hot d'Renate mir nix, dir nix au an Roller ghet. Ehrlich gsagt: Do han I drauf schpekuliert. Weil I woiß, dass sie ihren Vadder um da Finger wickla ko und so ziemlich elles kriagt, um was se ihn bittet.

Zu zwoit isch des Rollerfahra halt oifach nomol so schee wie alloi. Mr ko sich vielmehr Sacha ausdenka zum Schpiela. Mir schtella uns zum Beischpiel gern vor, mir seia in dr wilda Prärie und däta unsre Pferdla reita. Mir deen au Rennerles oder besser Wettreita auf 'm Gehweg schpiela. Dr Gehweg isch bei uns draußa, bis in d'Schtadt nei, ziemlich breit. Do ko mr subber fahra. Aber no viel besser für unser Pferdles-Schpiel sin die Fahrwegla am Dachsberg. Do ko mr im Karacho zwischa de Wengärt nunterdonnern. Des ko ganz schee schteil sei'. Und 's holpert natürlich au, weil die Wegla sin net betoniert, sondern nur plattgedrückte Erde und zwischanei mol a Wurzel von de Weinreba. Wenn mr net aufpasst, no haut 's oin voll no und 's gibt a paar blaue Flecka. Mir hen zwar boide Bremsa für die hintera Reifa, aber meischtens muss mr, wenn 's so schteil nuntergoht, mit vollem Körpereisatz ahalta und zur Not runterhopfa.

"Sag amol", hot mei Vadder mi geschtern gfragt, "was machsch du eigentlich mit deim Roller?" I han natürlich erscht amol ganz oschuldig doa, aber scho gwusst, woher dr Wind weht.

"Dei Fähnle isch ja gar nemme dra und der Roller hot an ganza Haufa Kratzer und Della. Du? Du brauchsch fei gar net so treuherzig gucka. I woiß, was für a Wilde du bisch. Also: Was zum Kuckuck machsch du mit dem Roller für abenteuerliche Fahrta, liebes Fräulein?"

Des mog I gar net, wenn mei Vadder mi Fräulein nennt, des klingt so doof. "Nix!", han I geantwortet und d'Arme vor dr Bruscht verschränkt. Meine Lippa wara verschlossa wie beim a Indianer. "Nix! Hugh, ich habe gesprochen!" Des sagt dr Winnetou au immer und no woisch, wo da dra bisch. Mei Vadder hot mi erscht a bissle entgeischtert aguckt. No hot er schmunzla müssa. Aber no isch er wieder ernscht worda: "Du bisch und bleibsch an Hitzkopf. Do hot dei Mutter vollkomma recht. Aber oins sag I dir: Wenn dr Roller hee isch, gibt 's koin neua. No isch zappenduschter, hosch du mi verschtanda?"

"Dr rote Blitz isch unverwundbar und wenn, no schterba mir gemeinsam!"

"Oje", hot mei Vadder gsagt, "mit Karl May ko I net konkurriera. Also no, edle Squaw, mach was de willsch."

Sowieso, han I denkt und dass net bloß d'Renate ihren Vadder um da Finger wickla ko.