Читать книгу In gesprek met God - Milanie Vosloo - Страница 13

Mosterdsaadjie

Dis so maklik om van U te vergeet.

Die wêreld hou ons so besig. Ons hardloop almal in sirkels; probeer ons lewe vol maak met besigweesgoed …

soek plesier, mag, status, geld, blink goed –

en dan bly ons dolleeg … in ons niks-lewe.

Ek is moeg gesoek, Here!

Ek erken vandag dat ek U nodig het.

Vul my hele wese met U.

U gee genade, vrede, wysheid, liefde … U gee lewe.

Ek is maar ’n klein saadjie in u groot heelal.

Maar ek bly van nou af in die rykdom van u grond en wag dat U my sterk sal maak,

sal laat groei in my liefde vir U.

Laat my régtig leef:

nou, en altyd.