Читать книгу Katalekte - Breyten Breytenbach - Страница 19

in die nag is hy dikwels ’n koevert

hy skryf die dokumente van geboorte

nietnotas, belydenisfragmente soos skrifsels

wat aan moet dui waar ’n fuik

in die donker neergelaat is

om môre se witvleis te vang

hy weet hy plak die koevert toe

en pos dit in die gleuf tussen lakens

die bus waar bewuste gedagtes verdwyn

langs onbekende weë

na ’n verseëlde aankoms

en glip dan weg in geraasslaap

wanneer die dag oopgeskeur word

soos ’n koevert uit die vreemde

soek hy in die lig wat om alles en elk

die stilte van gestaltegee kelk

die betekenis van die brief

die palimpses as testament:

hoe ’n ontwrigte weegskaal se gewig

die versreëls in bewieging bring

sodat woorde nog kruip

en segment vir segment sing

soos die knypers van ’n kreef

wat die onnoembare lyk gevreet het