Читать книгу In die buitenste ruimte - Danie Marais - Страница 13

Kersfees

– ek ge-ponytail en sonder oorbelle –

my storie

en al sy hoofkarakters

effens ongemaklik

sweterig

saamgepak

op oom-en-tannie-hulle se rusbank

soos tande in ’n te klein onderkaak

om plek te maak vir

die vêres en die dooies

wat vandag

nie met ons kan wees nie.

Ouma se artritis-handjies probeer

frommel-frommel

aan my broekspyp

vashou.

My pa moet vinnig maak

om ook op die foto te wees,

maar hy’s nie oorhaastig nie –

hy gaan nie

soos my ma

loop senuagtig raak

oor so ’n self-timertjie nie.

Die kamera bzzz,

die rooi liggie flits

en ons glimlag te mooi

vir die oog wat afgetrokke

deur die lens loer

as die sluiter

klik.