Читать книгу In die buitenste ruimte - Danie Marais - Страница 9

In my trem

staan ’n tienermeisie en haar ma –

staan en skommel saam huis toe

in die verstikkende hitte.

Die ma lyk moeg en afgerem,

maar die dogter is

blink en nuut en belangrik.

Hierdie stad en trem vol

skyndooies

is vir haar duidelik

niks anders as props en decór nie

want, man,

sy vat die kollig.

Haar T-shirt sê:

real pretty

cool independent

impulsive naughty

lovely

GIRL

Ek sit en kyk vir haar,

maar ek dink aan Lisa se tannie –

op Touwsrivier verwurg

met die bedlampie se kabel,

haar kop ingekap met ’n klip –

met die rooskwarts op die bedkassie,

die aandenking van die familieplaas

in Namibië.

Ek voel skielik duiselig en narerig,

maar die trem skud aan

– “warp speed, Mr Sulu” –

skud verder, gaan voort.