Читать книгу Саха фольклора - Группа авторов - Страница 9

Биир тиит отут мутуктаах үһү. (Ый хонуга)

Ким да кинини күһэйбэт, бэйэтэ кэлэр-барар үһү. (Күн-дьыл)

Киһи сылайбакка түүннэри, күнүстэри барар үһү. (Чаһы)

Куулаҕа отут хабдьы, халдьаайыга сэттэ бочугурас баар үһү. (Ый, нэдиэлэ)

Саҥата суох дьыл хонугун ааҕар баар үһү. (Халандаар)

Сэттэ сымыыттан биирдэрэ кыһыл көмүс үһү. (Баскыһыанньа)

Туут балык сэттэ кэрчиктээх үһү. (Нэдиэлэ күннэрэ)

Уон икки салаалаах, биэс уон икки мутуктаах, үс сүүс алта уон биэс туораахтаах биир тоҥ харыйа баар үһү. (Төгүрүк сыл)

Үөрэх, үөрэнэр тэрил, сурук-бичик

Аан дойдуга туохтааҕар да күүстээх туох баарый? (Үөрэх)

Атаҕа суох – хаамар, кыната суох – көтөр, тыла суох кэпсиир баар үһү. (Сурук)

Илиитэ, атаҕа суох да буоллар, барыга үөрэтэр. (Кинигэ)

Отой тыла суох окур-бокур оҕолор кэккэлэһэн эрэ турдаллар кэпсээбитинэн бараллар. (Буукубалар)

Саҥарбатар даҕаны аан дойду араас сонунун кэпсии олорор баар үһү. (Хаһыат)

Сирэйэ үрүҥ да, санаата эриэн баар үһү. (Сурук)

Сүүсчэкэ бырааттыылар бииргэ тиһиллэ сылдьаллар үһү. (Кинигэ)

Хара Уйбаан мас ырбаахылаах, ханна муннун таарыйар да бэлиэни оҥорор баар үһү. (Харандаас)

Хараҕа суоҕу харахтыам диир баар үһү. (Үөрэх)

Эдэр киһи ыраас хонууга ыстаҥалаабыт суола сүппэт үһү. (Суруйуу)