Читать книгу Ingrid Jonker Versamelde Werke - Ingrid Jonker - Страница 41

In die reën wat verby is

ver dag en verlore stad

van akkers van duiwe vol dagbreek

was my hande die ene eekhorinkie

vinnig sku maar voorbereid

ver dag en verlore stad

deur al die mense het jy gekom

met ’n eenvoudige glimlag

soos van ’n lang reis

en die reën wat verby is

het hom verwarm aan my lyf

die reën van rook en oker

wat ruik na jou hande skoongewas

na warm duiwe en die oop

oranje papawer van die lug