Читать книгу Бозлы җилкәннәр / Ледяные паруса - Рәмис Аймәт - Страница 24

Ике мең дә беренче ел. Гыйнвар.

Өнемме бу, әллә төшемме?

Яшәү дигән изге газаватта

Бәргәләнгән соңгы көнемме?

Онытылып җиргә яңгыр ява, –

Соңгы елавымы Күкләрнең?!

Күз яшеме, яңгыр астындамы –

Күпме гомер җирдә үткәрдем?

Ява яңгыр. Кышмы, язмы җирдә,

Буталганмы әллә бары да?

Гасыр башы. Ә мин басып торам

Язмышларның текә ярында.

Басып торам. Чәчләремне юа,

Юа яңа гасыр яңгыры.

…Сур быргысы сыман әллә кайдан

Ялгыз торна тавышы яңгырый.

Яңгыр исе белән яз иленнән

Килеп чыккан мәллә бахырым?

Саташуыммы бу? Белмим… белмим.

Гасыр башы – гасыр ахыры.

Дөнья буйлап яңа гасыр атлый.

Атлый золым, кан-яшь, ут аша.

Әйтерсең лә, минем аша кичеп,

Ике гасыр килеп тоташа.

Ике гасыр бәргәләнә миндә.

Орыш бара җанда ник гелән?

Ут беләнме? Юк, юк! Гасырларны

Мин бәйлимен шигъри сүз белән.

Узган гасырданмы ачык калган

Күк капкасын килеп кем ябар?

…Онытылып, җиргә яңгыр ява.

Ике мең дә беренче ел. Гыйнвар.