Читать книгу Mede-wete - Antjie Krog - Страница 19

almal is by die huis

ek kook die wêreld as kos

is ’n vermenslikte wêreld

om te kook is ’n daad van hoflikheid

die kombuis damp in goue beslag

van lag en wyn en spesery

die naelstring tussen ons en die wêreld

is die kastrol – ouma Dot se kastrol

in die oond – gestop met roosmaryn

en stafies knoffel sis die boud

elke brandende bos is ’n heilige bos

maar wie skaapboud voorsit is ’n priester

ek kook rys asof ek vir kindertjies sorg

met ’n titseltjie neut prys ek die skepping

geskropte wortels begin van binne af gloei

in botter en gemmer vind hulle ’n ware

stem boontjies dompel in wit peper en vinkel

’n slaailepel ontbloot ’n korenteflits en die sag-

klikkende juwele van naak olyf kerstamatie en

amandel die diepste so-wees van pampoen kom

op die tafel die geëte-van-die-oorvloed-wêreld

is ’n liefgehadde wêreld ’n maaltyd

wat oorstort van hartlikheid se versaligde

geluide ja, kosgee is ’n morele daad

’n wederopstanding. my uitgelate gesin sit aan –

ineens broos in hulle genoegheid hulle on-

beskadigdheid ons almalnogsaamheid. ons prys

die gulle-gee as die groot genoegsame Garansie.

Die vatters van die aarde vat hande.

(na Martin Versfeld)