Читать книгу Ingrid Jonker Versamelde Werke - Ingrid Jonker - Страница 12

Die lig brand helder in my ateljee

en helderder is ek vanaand geklee:

Hier waar ek nou begin om jou te haat

verf ek ’n spotprent van jou mooi gelaat

Verf ek jou as sirkus-harlekyn

maar sou jou oë dromerig verskyn

As hierdie masker netnou met die dans

verroer en jou nie heeltemal verskans

Sou ek jou uitwerp in die straat

maar in die nanag hierdie ateljee verlaat

Om jou te soek teen duistere rante

verflenter en verwaai na alle kante

Om jou te vind en fluist’rend te bely:

Daar kan geen haat wees tussen jou en my.