Читать книгу Deur ruite van die reis - Melanie Grobler - Страница 8

Soos koraal, half vlees, half klip, staan die skiphuis

in sy hart – maer en lenig, altyd in vervoering

soos die dag toe hy uit die vlamme van sy verbeelding tree

om met swaaiende arms al langs die duine te draf

die intensiteit van sy gedagtes, sy gemoed

gevul met skadulyne en terreine en volumes

wat herinner aan oorlogskepe

draakkoppe wat vlamme spu aan die boë

wyd uitgestrek die louwarm baai

waar die skip om die bog vaar

uit die vuur en drang

klim hy die trap na die tekenkamer

om sy skiphuis op die soutwater van verganklikheid

te teken. dan volg die waansin van die transformasie

as hy, albatros, eers die huis, dan die louwarm baai omsingel

stilte as die seevoël op die draak se kop gaan sit.