Читать книгу Kinders wat moor - André le Roux - Страница 13

Dit was ’n dwase, bisarre tyd.

Satan was op huisbesoek in Suid-Afrika.

Êrens, iewers in ’n ondergrondse kamer, staan versluierde figure in dowwe lig rondom ’n altaar. Die lig kom van flikkerende swart kerse, party gemaak van mensvet. Daar is pentagramme teen die mure, swart kruise en ander duiwelse simbole. Op die altaar lê ’n jong meisie in ’n wit gewaad. Sy is deur al die mans in die kamer verkrag. Gesiene mans soos politici en sakemanne met geheime Satanistiese lewens. Hoëpriesters en Prinse van die Duisternis.

Nou offer hulle die meisie op met ’n mes deur haar keel.

Net verlede week, elders in die stad of op die platteland, is ’n baba opgeoffer. Dit gebeur tot twee keer per week. Babas word “geteel” vir Satan en swanger tieners word aangemoedig om hul babas by geboorte aan Satan af te staan.

Êrens, iewers.

Jongmense, die Goths en “Alternatiewes”, in opstand teen gesag en konvensies van hul ouers en die Kerk, het swart klere gedra, hul naels swart geverf, swart kerse aangesteek en glasie-glasie gespeel. Dan noem hulle hulself Sataniste en verkoop hul siel aan die duiwel.

Duiwelaanbidders. Grafskenders.

Dit was die middel 1980’s en die ’90’s. Mense was op hol. Suid-Afrika was in die duisternis van Satan-paniek, ook genoem morele paniek.

Die Griekse god Pan het vir ons meer nagelaat as net die panfluit. Ook die woord “paniek”. Hy was glo so lelik met sy baard, stert en bokpote dat sy ma by sy geboorte Paniekerig van hom weggehardloop het. En wanneer hy in sy middagslapie in die woud gesteur is, het hy met ’n skielike harde geskree mens en dier vreesbevange laat spaander.

Die “satanic panic” het rondom die 1980’s in Amerika begin met aansprake van wydverspreide sogenaamde “satanic ritual abuse” (SRA). Party mense is onskuldig tronk toe gestuur. Dit het ’n hoogtepunt bereik in die vroeë 1990’s en toe begin taan namate Amerikaanse sielkundiges, navorsers en die polisie die hele ding begin bevraagteken het.

Maar in Suid-Afrika was die paniek nog in volle swang. Dit was ’n epidemie wat gou die openbare verbeelding aangegryp het. Satanistiese simbole het hul verskyning gemaak op kinders se skooltasse, potloodboksies en aantekeningboeke. Die kinders is daarteen gewaarsku. Tydskrifte, koerante en Die Kerkbode het daarteen geskryf. Predikante het daarteen gepreek. Politici het daarvan kennis geneem in die parlement.

Satanisme is werklik en dis hiér. Wee jou die Broederskap van die Ram met sy gewaande 200 000 lede, wat destyds ’n volle 10% van die wit Suid-Afrikaanse bevolking sou wees.

Oral in evangeliese kerke is duiwels uitgedryf, soms met noodlottige gevolge. Dis deel van sogenaamde verlossingsbediening (“deliverance ministry”) sodat jy gereinig kan word van die duiwelse geeste, want dis waar al jou probleme vandaan kom.

Al hoe meer kinders het begin getuig hoe hulle van Satanisme verlos is toe hulle tot bekering gekom het. Daardie gedurige stryd tussen goed en boos. Dit was ’n spirituele probleem, nie sielkundig nie.

Sulke Sataniste wat “reggekom” het (“recovered”), was nooit self by rituele betrokke nie, maar hulle kon presies vertel wat daar gebeur het. Of hulle was self die slagoffers met ’n fantastiese storie om te vertel. Daar was orgies, massaverkragtings, bestialiteit en bloed. Die polisie het Satanistiese lêplekke oopgekrap met gruwelike detail van skedels en mensvetkerse.

Satan was daarop uit om die bestaande orde, die beskawing soos ons dit geken het, en Christelike waardes omver te werp. Hy’t oral geskuil. Tienerswangerskappe en dwelms was sy skuld. Ook heavy metal-popmusiek en die Voëlvry-rockbeweging, wat op universiteitskampusse verbied is, was duidelike bewys van Satan se musieksmaak.

Dalk die mees bisarre van Satanisme, sê die sielkundige Scott Lilienfeld en kollegas, is dat heavy metal-groepe Satanistiese boodskappe in hul opnames ingeglip het. Jy hoor dit as jy die plaat agteruitspeel, en die boodskappe moedig die jeug aan om selfmoord te pleeg.

Sogenaamde backmasking. Dit het reeds in 1969 begin met die Beatles se liedjies “Rain” en “Revolution 9”.

Wag, dis heeltemal moontlik om boodskappe te hoor waar daar nie is nie. Die verskynsel het ’n geleerde naam: pareidolie, wat Wikipedia definieer as “’n sielkundige fenomeen waarin die brein op ’n stimulus reageer, gewoonlik ’n beeld of klank, deur ’n bekende patroon waar te neem waar daar nie een is nie”.

Op dieselfde manier sien ons gesigte in wolke, rotse of op Mars. En dis presies waar die man in die maan vandaan kom.

Dis deel van ’n ander mite genaamd subliminale boodskappe, wat onbewustelik gehoor word.

Waarvan niks sin gemaak het nie. Waarom sal kunstenaars die mense wat hul musiek koop, aanmoedig om selfmoord te pleeg? Christenjeuggroepe in Amerika het inderdaad plate verbrand uit protes.

Satan was in die mistieke, in enigiets Oosters. Oosterse ornamente, selfs Persiese tapyte. Om nie te praat van Boeddhisme en Hindoeïsme nie. Afgodery.

“Raak ontslae van Persiese tapyte en Boeddha-beeldjies,” het John Gardiner, voormalige tydskrifredakteur, en sy vrou, Helen, geskryf. “Dit nooi net Satan by jou huis in.” Aangehaal deur die Johannesburgse mediakenner Nicky Falkof. Die Gardiners het ook vertel van “Sarah” wat ’n aborsie ondergaan het en toe die fetus moes eet.

Satanisme het geen perke geken nie.

En joga. Satan wag net totdat jy joga doen of mediteer, en sodra jy mooi stil word, gryp hy jou siel.

“Is karate en joga van die duiwel?” het Huisgenoot plegtig gevra in die uitgawe van 10 Julie 1986. En ’n professor van Stellenbosch (F.J.M. Potgieter) het in Die Kerkbode koeng foe bygevoeg. As jy koeng foe beoefen, stel jy jouself oop vir Satan.

Falkof haal ’n Satanjagter aan wat verdere gevare uitgewys het: Die Sterre Voorspel, toordokters, kettingbriewe, hipnose, kleurterapie, homeopatie, refleksologie, akupunktuur, dagga, alkohol, LSD, slaappille. Flieks soos The Exorcist, Rosemary’s Baby en The Omen, vanselfsprekend verbied deur die sensuurraad. Boeke soos Richard Bach se Jonathan Livingston Seagull, oor ’n seemeeu wat teen konvensies in wou vlieg, en Anton LaVey, stigter van die Kerk van Satan, se standaardwerk The Satanic Bible wat in 1969 in Amerika verskyn het.

Byna vanselfsprekend was pornografie en homoseksualiteit, spesifiek “lesbiërs”, ook op die gevaarlysie. Nes masturbasie, buitehuwelikse seks, seksuele fantasieë, maar ook “negatiewe emosies”.

Alles met die komplimente van Satan.

Die destydse Transvaalse Onderwysdepartement het ondersoek ingestel en ook ’n paar waarskuwingstekens bygevoeg: “Ekstreme rebelsheid, ’n geneigdheid om swart te dra, ’n belangstelling in seks en dwelms, en ’n smaak vir heavy metal-musiek.”

Dus: doodgewone, normale adolessente.

Die destydse minister van gesondheid, dr. Rina Venter, het dié tekens beaam en ’n “aversie teenoor Christenskap” bygelas. Die polisie se eie webwerf het 41 tekens uitgewys, waaronder “genderverwarring”, fantasiespeletjies, Gotiese modes en ’n belangstelling in rekenaars(!).

Ja, hy onthou Satanisme, het ’n jong man aan Falkof gesê, sy beste vriendin op skool was ’n Satanis. Of sy’t probeer om een te wees.

“Mense het na ons skool gekom en praatjies gelewer oor Satanisme. Sy het dan geluister na wat Sataniste doen en dan’t sy dieselfde gaan doen. Nou nie die moord en seks nie, maar die ander dinge. Sy’t haar arms gesny en met haar bloed goeters op mure geskryf. Al die Sataniste in ons skool het hard probeer om mense te laat glo hulle is bad.”

Die Sataniste in die skool was ’n grap, maar daar was ’n negatiewe nadraai vir sommige kinders. Hulle is gestigmatiseer en uitgeskuif.

“Julle speel met vuur, met die duiwel self. Satanisme is ’n misdaad teen die mensdom!” het die destydse minister van wet en orde, Adriaan Vlok, onomwonde verklaar.

Satan was deel van die kommunistiese aanslag, die Antichris.

Die SAUK is daarvan beskuldig dat hy Satanisme bevorder met Ghostbusters, Superman en Teenage Mutant Ninja Turtles. Dié beskuldiging het van ’n swart studenteorganisasie in Soweto gekom.

Satan het die townships bereik.

Die wit Satan-paniek, skryf Falkof, het min of meer op dieselfde tyd gekom toe daar ’n toename in moetiemoorde en heksery in die townships was.

Bloemfontein het die eer gekry as die Satanistiese hoofstad van die land. Oos-Londen, Durban, Johannesburg en die Oos-Rand het ook nie agtergebly nie.

Maar die polisie was reg vir Satan.

Een van die bekendste Satanjagters was Kobus Jonker, bekend as Donker Jonker of God se Speurder, ’n polisieman en wedergeborene aan die hoof van die polisie se okkulteverwante misdaadeenheid, die sogenaamde “cult cops”. Dié eenheid is in 1992 gestig om misdrywe van Satanistiese rituele te ondersoek, die wêreld se “enigste rituelemoord-taakmag”.

Kol. Jonker het in etlike hofsake as ekspertgetuie vir regters verduidelik hoe Satanisme nou eintlik werk. In die saak teen Angelique Orsö en Lawrence van Blerk, wat haar ma met ’n braaipan doodgeslaan het, het regter D.M. Williamson inderdaad – verstommend – “aanvaar dat mense deur duiwels besete kan wees”, maar hy was nie oortuig dat dit hier die geval was nie.

Die geloof in Satanisme was sterk genoeg dat selfs die regbank die moontlikheid erken het, sê Falkof.

Jonker het daarop aanspraak gemaak dat hy 19 moorde, 6 verkragtings en 4 roofsake in die 5 jaar voor 1994 positief met Satanisme verbind het. Hy het glo 500 sake ondersoek en 114 mense gearresteer. Sonder om te sê hoeveel hiervan in die hof beland het of op watter aanklagte.

Hy het wel gesê 45 Sataniste is die afgelope 3 jaar skuldig bevind op klagte wat wissel van sodomie tot verkragting. Hy het ook Satanistiese selle in ryk buurte in Bloemfontein en Pretoria oopgevlek, laasgenoemde die kinders van hoë staatsamptenare en predikante. In Bloemfontein het hy ’n kers ontdek wat van mensvet gemaak is, maar hy’t erken hy’t nie die liggaam gekry nie.

“Ek glo die duiwel bestaan,” het hy in die polisietydskrif Servamus geskryf, “want ek het dinge sien gebeur. Ek het ’n vrou gesien wat reg in my teenwoordigheid aangeval is deur ’n demoniese wese.”

Snye het skielik op haar arm uitgeslaan en ook die duiwelse getal 666.

Dit was nie ’n geïsoleerde geval nie. Hy’t dit herhaaldelik gesien. Daar was ook die 11-jarige meisie in KwaZulu-Natal, het hy in 2010 aan die aanlyn tydskrif Vice vertel. Terwyl ’n pastoor vir die meisie gebid het, het verskillende stemme by haar keel uitgekom en bloed het by haar borste uitgespuit. ’n Rukkie later het ’n string miere skielik by haar tepels uitgeloop.

“Miere?”

“Ja, miere. Toe hou dit skielik op, maar toe klim daar ’n klein waterskilpadjie by haar naeltjie uit. Van die ander pastore in die vertrek het weggehardloop.”

’n Klein waterskilpadjie?

Jonker erken hy sou dit ook nie geglo het as hy dit nie self gesien het nie.

Oral in sy studeerkamer was Satanistiese snuisterye, “bewyse”, soos hy dit genoem het. Hy het nie geskroom om vir ’n foto te poseer met ’n afgeslagte kat wat hy aan die nekvel soos ’n trofee omhoog hou nie. Jonker het vertel hoe een van Eugène Terre’Blanche se lyfwagte (hy was ’n Satanis, die lyfwag) aan hom gesê het wat hulle met katte doen, swart katte.

“Hulle bind stokke tussen die kat se bene vas sodat dit nie kan beweeg nie, sit die kat op ’n altaar en dan …” In Port Elizabeth het daar in ’n stadium meer as 60 katte in een area weggeraak, het hy vertel.

Nog meer bisar was Jonker se aanspraak dat hy eenkeer die tokkelossie gesien het …

Dit was in Venda, het hy aan Vice vertel, op die plaas van ’n welgestelde familie waar die tokkelossie elke nag ’n jong meisie verkrag het. Daar was geen plaasdiere nie. Die diere het weggetrek. Buite die plaashuis het uitgebrande klere oral op die grond gelê, want elke keer dat die meisie haar klere wil aantrek, slaan dit aan die brand.

Jonker het ingegaan en begin bid vir die meisie wat op ’n bed gesit en ’n lemoen geëet het.

Hy vertel: “Ná sowat 20 minute het ’n deur langs my oopgegaan en ’n klein mannetjie, soos ’n dwerg, het na my toe gehardloop. Hy was ’n ou swart man en het oormatig gesweet, al was dit ’n koue dag.

“Ek het gesê: ‘Wat maak jy hier? Kan ek jou help?’ En hy’t in ’n growwe stem geantwoord: ‘Ek wil haar help.’

“Ek het vir hom gesê hy moet loop, want ons is besig. Hy’t gegrom en geloop. Niemand op die plaas het geweet wie die kort mannetjie was nie en niemand het hom sedertdien weer gesien nie.”

Hy was ’n fisieke mens, nie ’n spook of gees nie. Hierna het die nagtelike verkragtings opgehou en die plaasdiere het teruggekeer.

Nee, Jonker het nie gesê of die tokkelossie Afrikaans gepraat het nie …

Dinge kan erger raak.

Pasop vir 30 April, die belangrikste datum op die Satanistiese kalender, het Jonker gewaarsku. Dis Walpurgisnag wanneer menslike offerandes wêreldwyd gebring word, gewoonlik babas en kinders, deurboor met seremoniële dolke.

Dit “verklaar” die onverklaarbare verdwyning van kinders. Ouers is gewaarsku om nie hul kinders alleen skool toe te laat loop nie. Ouers in Port Elizabeth, Oos-Londen, Durban, Bellville en elders in die Wes-Kaap het hul kinders uit die skool gehou.

Dis hier waar die naam van die land se bekendste pedofiel ook opgeduik het. Gert van Rooyen was ’n Satanis wat skoolmeisies ontvoer het vir Satanistiese rituele, het sy seun Flippie vertel. Dit verklaar hoekom die meisies nooit gevind is nie. Maar geen bewyse is hiervoor gekry nie en Flippie, wat reeds in die tronk was weens moord, is ’n verdere vonnis opgelê vir meineed.

Daar was net een probleem met al hierdie Satanistiese aansprake. Dit het nie gebeur nie. Wêreldwyd kon nog nooit enige bewyse daarvan gevind word nie. (Sien, dit wys jou net hoe goed hierdie duiwels is, hulle laat geen spoor na nie, babas word huidjie en muidjie opgeëet!)

Dis ’n kenmerk van Satanistiese moorde dat dit nooit liggame oplewer nie. En waar daar liggame is, is dit bloot moord onder die vaandel van Satanisme ter verdediging en versagtende omstandighede, wat howe gewoonlik nie aanvaar nie.

Met die verminking van Michael van Eck se liggaam het Chané van Heerden en Maartens van der Merwe van Welkom dit kennelik te ver gevoer, psigopaties onder die dekmantel van demone.

Werklike Sataniste is nooit gesien, gehoor of in hegtenis geneem nie. Al wat sigbaar was, was naïewe, opstandige kinders in swart klere. Sataniste was net te vinde in die argiewe van tydskrifte en koerante, skryf Falkof. ’n Kulturele histerie teen die agtergrond van maatskaplike onsekerheid, politieke woelinge en ’n nasionale identiteit onder beleg in die laaste dae van apartheid.

“Satanisme was ’n morele paniek rondom ’n bedreiging so fantasties dat geen bewyse van die bestaan daarvan ooit aangeteken is nie.”

Toe, teen die 1990’s, het die duiwel teruggegaan van waar hy gekom het. Dit was die einde van die bisarre dwaasheid in Suid-Afrika. Almal was verniet so op hol.

En adolessente kon weer adolessente wees.

Glad nie so lank gelede nie, in die boekjaar 2014–’15, is nog 21 speurders opgelei om okkulteverwante misdaad te bekamp.

Reeds in 2012 het die polisie in ’n memorandum voorbeelde genoem: Van heksery, insluitend towery, vervloeking en voedoe, vampirisme, poltergeeste (“onverklaarde aktiwiteite deur ontwrigtende paranormale entiteite”) en aantygings van verkragting deur die tokkelossie.

Marcel Steyn en die Krugersdorpse afspraakmoorde

Dit was toe nie die einde van Satan nie. Eintlik was hy nooit weg nie.

Die demone was terug.

Hulle gooi jou teen die vloer en laat jou kerm soos ’n kind. Daar’s bloed in jou mondhoeke. Dan vat die ander oor …

Daar is meer as honderd “ander”. Jy gaan lê net op jou rug, maak jou oë toe, dan kom hulle vir jou. Lily, die een wat jou vervloek (en ook Maartens van der Merwe van Welkom besoek het). Daphne, die een wat graag kosmaak. Die bose Akeshia. Maar met ’n ander enetjie, die 3-jarige Anja, kan jy alte lekker speel en inkleur.

Cecilia Steyn (toe 35) van Krugersdorp aan die Wes-Rand was die baasbrein agter die sogenaamde Krugersdorpse afspraakmoorde. In 2018–’19 is in die Johannesburgse hooggeregshof aangevoer sy kon verskillende persoonlikhede aanneem, sogenaamde dissosiatiewe identiteitsteuring, nes Angelique Orsö se “meervoudige persoonlikheidstipes”.

Maar Cecilia Steyn het goed geweet wie Cecilia Steyn is. Geldgierige kultusleier, rampokker, bedrieër, bomplanter, dief en reeksmoordenaar.

Tussen 2012 en 2016 het altesaam 11 mense hul lewe deur haar verloor. Ses lede van die Overcomers Through Christ Ministry (OTC), die kultuskerk, is aangekeer. Hulle sou afsprake maak met eiendomsagente en versekeringsmakelaars, hul geld steel en hulle dan doodmaak.

Cecilia het die opdragte uitgedeel en al die voordele en opbrengste gevat “sonder om haar hande vuil te maak”, is in die hof aangevoer.

Die OTC se oogmerk was glo om Sataniste te bekeer. Hulle het duiwels uitgedryf. Pasop vir die Kerk van Satan! was hul waarskuwing.

Toe begin hulle mekaar doodmaak.

Nadat Cecilia uit die kloue van Satan ontsnap het, het sy haar eie bediening begin, Electus per Deus (EPD). Uitverkore deur God. Sy wou wraak neem ná ’n uitval met Ria Grunewald (61), leier van die OTC. (Grunewald woon sedert 2013 op ’n onbekende plek onder ’n nuwe naam.)

Die staat het aangevoer EPD was ’n onderneming wat mense vir geld vermoor het. En Cecilia het lustig haar eie volgelinge, tipies kultusleier, uit hul geld geswendel. Geld vir die sogenaamde weeshuis wat sy kamma vir “kinders van Satanisme” bedryf het, is direk in haar rekening inbetaal. Sy het gedurig geld nodig gehad omdat sy “siek” was. Dan leukemie, dan gepik deur slange, dan asma waarvoor sy ’n suurstoftenk byderhand moes hê, tot selfs in die hof.

“Ek sê mos ek is siek!”

Volgens ’n voormalige vriendin het sy die geld uitgegee op drank en motorfietse. Daar was ook dwelms. Sy sou moor vir geld. (Wat ongewoon is vir reeksmoordenaars.)

Vir regter Ellem Jacob Francis was dit die ergste saak in sy 18 jaar op die regbank. Eerder uitverkore deur Lucifer, het hy in Augustus 2019 in sy uitspraak gesê.

Dit was die ergste, wreedste, mees bisarre saak waaraan hy in sy 34 jaar as speurder gewerk het, het kapt. Ben Booysen aan Rapport gesê. Overkill frenzy, ’n sentiment wat deur prof. Gert Saayman, forensiese patoloog, gedeel is.

Dit was nie sommer hierjy-moorde nie.

Die regter het Steyn beskryf as “’n bose mens” met geen vooruitsig op rehabilitasie nie.

Haar ouers, Piet en Mara Brandt, het deurentyd in haar onskuld geglo. Hulle het haar “Poppie” of “Pop” genoem.

Haar eksman, Dries Steyn, ’n polisieman, het haar volgens ’n proefbeampteverslag beskryf as ’n goeie vrou en ’n goeie ma vir hul twee tienerkinders, ’n 13-jarige dogter en 15-jarige seun (beaam deur haar ma). Dries het ook geglo sy is onskuldig by die moorde betrek. Haar eerste huwelik, vóór Dries, het blykbaar net vier dae gehou.

Cecilia sê weens die dissosiatiewe identiteitsteuring verloor sy kort stukkies van haar geheue, maar as sy 11 moorde gepleeg het, dít sou sy tog onthou het?

Wie was hierdie vrou?

Cecilia is op 15 uit die skool. Sy was ’n Goth. Later sou sy aanspraak maak op etlike doktors- en meestersgrade, dat sy as mediese dokter aan die Universiteit Stellenbosch gekwalifiseer het. Volgens haar ma het sy nie op skool geleer nie, maar sy’t onderskeidings gekry.

Sy hou van lees, het sy in ’n onderhoud aan die Sunday Times gesê. Nou nie liefdesverhale nie, dis te voorspelbaar. Speur- en misdaadverhale. En ’n regshandboek van Unisa terwyl sy in aanhouding was.

(So lief vir kerk en Bybellees, het haar ma gesê.)

Sy het ’n normale kindertyd gehad, het Cecilia vertel. Netbal, tennis, karate en atletiek. Sy’t nie gehou van rokke nie, eerder weermagbroeke.

“Die naaste wat ek ooit aan popspeel gekom het, was GI Joe.”

Maar later het sy haar volgelinge wysgemaak sy’s ’n 42ste generasie heks (“die belangrikste heks van alle tye”), afstammeling van die farao Ramses II, ’n vampier en weerwolf. Sy kon astraal reis, Egipte toe, selfs maan toe. Sy kon op water loop.

Haar volgelinge het geglo dis eg wanneer haar slagtande – te koop by enige speelgoedwinkel – begin groei het, met bolletjies bloed in haar kieste, toegeknoop in die vingerpunte van plastiekhandskoene.

Lady Cecilia is in ’n ritueel met Satan getroud.

“Deur saad en wortel, deur knop en stingel, deur blaar en blom en vrug, deur lewe en lis: Ek, Satan, neem jou, Cecilia, as my bruid,” volgens ’n dokument wat by die hof ingedien is.

Sy was nou die Bruid van Satan. Wat nogal ’n nuwe gedagte was: Die Bruid van Satan wat op water loop …

In “hoë nagte” op die Satanistiese kalender het Cecilia bloed opgebring terwyl daar vir haar gebid word.

Alles sommer nonsens, het sy aan die Sunday Times gesê. Ondanks die bewyse van foto’s en video’s (op YouTube). Kyk, daar lê klein Anja opgekrul op die vloer …

“En selfs al is ek ’n vampier of heks, dis mos nie teen die wet nie?” het Cecilia verklaar.

Onder haar Know your Enemy-kursusgangers was sakemanne en prokureurs.

Marinda Steyn (50), ook van EPD, maar nie familie van Cecilia nie, was ’n gewilde, “saggeaarde” Engels-onderwyseres aan ’n plaaslike hoërskool – en self ’n goeie manipuleerder. Sy was Cecilia se tweede-in-bevel wat vir haar ingestaan het op verskeie van die misdaadtonele, volgens die hof. Sy is reeds vroeër saam met John Barnard (40) skuldig bevind en 11 keer lewenslank plus 115 jaar tronk toe gestuur. Sy het een van haar medebeskuldigdes, Zak Valentine (30), se vrou 60 keer met ’n mes gesteek nadat sy haar met ’n hamer oor die kop geslaan het omdat sy die groep wou verlaat.

“Mikeila, ek gaan jou nou vermoor … begin bid.”

Die toneel was besonder bloedig. Sy het dit “angswekkend maar terselfdertyd opwindend” gevind om iemand dood te maak: “Ek het ’n verligting gevoel wat ek nog nooit voorheen gevoel het nie,” het sy in die hof gesê.

In die hof het sy Cecilia, haar “beste vriendin”, probeer verontskuldig en gesê sý, Marinda, het die meeste moorde beplan. Nie Cecilia nie. “Sy dra die Vrug van die Gees.”

Valentine was ’n aktuaris met ’n BCom-graad en het ’n goeie werk as makelaar gehad. Hy het groot bedrae geld – tot R100 000 per maand – aan Cecilia gegee. Net so verstommend soos regter Williamson se uitspraak in die saak teen Angelique Orsö en Lawrence van Blerk, “dat mense deur duiwels besete kan wees”, het Valentine se regsverteenwoordiger, adv. Amanda Nel, gesê daar kan net een rede wees waarom ’n geleerde man soos hy Cecilia se stories geglo het.

“Werklike Satanistiese magte.”

Valentine is tot 8 keer lewenslank plus 93 jaar, effektief 25 jaar, gevonnis vir sy aandeel in al die moorde. Hy het sy vrou bedwelm sodat sy vermoor kon word.

Party van hul slagoffers is met, wat hulle genoem het, ’n chokie-chokie verwurg. Volgens Mevrou Y, wat vir 3 jaar in getuiebeskerming was, het Cecilia ’n versameling van 500 messe en pangas gehad.

Nee, dit was net meer as 800, het Cecilia haar gekorrigeer. Met ’n Zippo-versameling daarby.

Marinda het haar twee kinders, Le Roux Steyn en Marcel, gebruik om te help moor. Marcel was 10 toe sy Cecilia ontmoet het. Sy het Marcel banggepraat met die poppe op haar bed. Hulle het geheime name en vertel vir Cecilia alles wat Marcel doen. Wat herinner aan Chané van Heerden se poppe wat snags sou wakker word.

Marcel het by drie geleenthede gesien hoe Cecilia se tande groei wanneer sy kwaad raak, en sy was bang vir die demone, die “goggos”, waarmee haar ma haar gedreig het.

Volgens die twee kinders se stiefma, Hannelie Scheepers, is hulle in hul ouerhuis “gemanipuleer en gebreinspoel”. Hulle is verwerp. Mevrou Y het aan Rapport gesê: “Nie Marcel of Le Roux het dié lewe gekies nie, hul ma het dit vir hulle gekies.”

Le Roux was 16 toe die eerste moorde gepleeg is. Marcel 14. Die eerste keer het Marcel net toegekyk.

Sy het getuig hulle het op ’n varkkop geoefen om “met ’n mes te steek en met ’n byl te kap”. Sy het deelgeneem aan die moord op Mikeila en het haar met ’n mes gesteek.

Marinda Steyn wou nie in die hof die name van Cecilia se verskillende persoonlikhede noem nie, want “netnou luister hulle” …

Cecilia Steyn was waarskynlik ’n psigopaat sonder gewete. Die meeste reeksmoordenaars, het talle navorsers bevind, is inderdaad psigopate.

“Net jou gewone huisvrou-psigopaat wat te veel gruwelflieks gekyk het,” het kapt. Booysen haar beskryf.

Die leuens, intimidasie en geslepenheid. Gebrekkige emosies, in die sielkunde bekend as flat affect. Geen berou of skuld of skaamte nie. Alles vir eie, egosentriese gewin. Ander mense se gevoelens – en lewe – beteken niks.

Hulle manipuleer om te kry wat hulle wil hê. Oortuigend, en daarom gevaarlik.

Cecilia was die meesterbrein agter die moorde.

Meestermanipuleerder.

“The ultimate manipulation is to kill someone,” het die kliniese sielkundige en psigopaatkenner Martha Stout gesê.

Die hof het bevind Cecilia is ’n patologiese leuenaar, “’n meesteres van oëverblindery”. Sy was ’n “indrukwekkende” getuie wat selfs onder moeilike kruisondervraging by haar storie van onskuld gehou het.

Psigopate het nie “senuwees” nie. Hulle is nie angstig nie en bekommer hulle oor min. Hulle voel vere vir gevolge en word nie afgeskrik deur straf nie.

Cecilia Johanna Steyn het haar vonnis van 13 keer lewenslank plus 155 jaar stil aangehoor, effektief 25 jaar. Sy sal dus in 2044 op 63 kan aansoek doen om parool.

“Dis lank,” het sy vlugtig aan ’n TV-verslaggewer gesê op pad hofselle toe. Amper vriendelik, amper beleefd, selfs sjarmant. In die hof was haar houding kaatjie van die baan.

Alles psigopatiese eienskappe. Weg was die suurstoftenk.

Le Roux Steyn het ’n staatsgetuie geword en is tot effektief 25 jaar gevonnis. Marcel is skuldig bevind aan nie minder nie as 8 moorde en nog 13 verwante aanklagte, waarvoor sy tot 7 keer lewenslank plus 144 jaar (samelopend, dus ook 25 jaar) gevonnis is.

Deur alles, te midde van al die moorde, het Marcel 6 A’s in matriek gekry.

Satan-swendelaar

’n Ander nooientjie Steyn, Leone Steyn van Roodepoort, het gesien daar’s geld te maak uit Satan.

Leone was 17 toe sy in 2010 ’n fiktiewe Satanistiese kinderpornografie-netwerk “begin” het. Sy het kamma ’n tehuis bestuur vir kinders wat uit die kloue van dié netwerk ontsnap het – sy ook – en die kinders het vanselfsprekend kos en klere nodig gehad.

Dink geld, en Cecilia Steyn.

Op dié manier het Leone kerke, goedhartige inwoners van Roodepoort en ’n aanlyn ondersteuningsdiens (MobieG) oor 3 jaar uit meer as ’n halfmiljoen rand geswendel. Sy het 55 vals profiele op sosiale media geskep van kinders wat hulp nodig gehad het. Van die kinders het sy laat selfmoord pleeg om simpatie te wek.

Die kinders het vertel van ontvoerings, Satanistiese rituele en selfs moorde, die seksuele mishandeling.

Dit het sowat 300 beraders, almal vrywilligers, besig gehou. En getraumatiseer weens die “selfmoorde” wat hulle nie kon keer nie.

Leone is eers in 2016 aangekeer. In die hof is haar geestesgesondheid betwyfel en sy is vir sielkundige waarneming gestuur. Sy is in psigopatiese terme beskryf as genadeloos, manipulerend en inherent gewetenloos.

Sy het ’n opgeskorte vonnis van 5 jaar gekry en is onder huisarres geplaas.

Morné Harmse

’n Spook het vir hom gesê hy moet ’n Satanis word en Satan het gesê hy moet mense aanval.

Op die oggend van 17 Augustus 2008 het Morné Harmse, ’n tingerige matriekseun, ’n masker op sy gesig gesit – soos die masker van Corey Taylor, die hoofsanger van die heavy metal-groep Slipknot – en op ’n moordtog gegaan by sy skool, die Nic Diederichs Tegniese Hoërskool, in Krugersdorp.

Krugersdorp. Satan-wêreld.

Morné was 18.

Hy het een leerder, Jacques Pretorius (16), se nek-aar noodlottig met ’n samoerai-swaard (katana) van 60 cm afgekap en nog ’n 18-jarige leerder asook twee tuiniers wat wou help, ernstig gewond. Hy het nie sy slagoffers geken nie.

Alles was verby toe hy daarna op ’n muurtjie gaan sit en die swaard in die grond langs hom druk. Nog drie swaarde is in sy skoolsak gevind. Sy pa het die swaarde ’n paar jaar gelede vir hom gekoop.

Minstens drie van sy vriende het geweet van die aanval wat kom. Hulle het dit saam beplan. Hulle wou iets doen wat “indrukwekkende gevolge” sou hê. Maar die drie vriende was nie ernstig nie. Morné het besluit om alleen voort te gaan.

Toe die skoolklok lui, het hy gereed gemaak.

“Ek het my gesig swart gesmeer, een van die maskers opgesit, die Slipknot een, twee swaarde in my gordel gesteek en nog een in my hand vasgehou. Ek het handskoene aangetrek en elmboog- en knieskerms vasgegespe.”

Hy het 18 maande tevore na Slipknot se musiek begin luister.

’n Groep maats het hom genader en begin lag.

Toe swaai Morné die swaard en tref Jacques teen die nek.

Vyf dae ná die moord het sy ouers, Machiel en Liza, ’n ope brief aan Beeld geskryf waarin hulle sê hul kind was stil en altyd op sy plek. Hy is egter klein en maer vir sy ouderdom en is daarom dikwels deur boelies in sy vormingsjare verkleineer. Hulle is ’n streng maar hegte en liefdevolle gesin wat hom teen die boelies probeer beskerm het.

Sy ouers het gevra mense moet hulle asseblief nie oordeel nie. Hulle het tot daardie Maandagoggend nooit kon dink hy is tot so iets in staat nie, skryf hulle in die ope brief. Hulle het nie besef watter impak die fisieke en emosionele mishandeling op hom gehad het nie.

Verontskuldigend, veral die pa.

Toe sy ouers hom die vorige dag in die tronk besoek het, was hy baie deurmekaar en kon feitlik niks van die voorval onthou nie. Hy het gesê hy het magteloos en waardeloos gevoel en hy wou vir homself opstaan. Hy wou “iemand” wees. Hy wou “hulle” wys, maar dit was nooit sy bedoeling om iemand dood te maak nie.

Sy ouers dink sy betrokkenheid by Satanisme het aan hom ’n mate van beskerming gegee.

“Toe ek die masker opsit, het alles doodstil geword en my liggaam het beweeg. Ek wou stop, maar ek kon nie.”

Morné het self die maskers gemaak, een met die gesig van ’n nar.

Hy is na die Sterkfontein-hospitaal vir waarneming verwys waar psigiaters bevind het hy is bevoeg om verhoor te word. Hy het skuld beken, maar volgens die staat het hy geen berou getoon nie. Die hof het dit versagtend gevind dat hy “onvolwasse” vir sy ouderdom was, volgens ’n maatskaplike werker en sielkundige.

Die hof het ook ’n ander storie as dié van ’n “liefdevolle” gesin gehoor. Morné se verdediging het aangevoer hy kom uit ’n disfunksionele gesin met ’n geskiedenis van gesinsgeweld. Hy was bang vir sy pa wat hom gereeld geslaan het, het ’n sielkundige gesê.

Hy was “’n gekompliseerde persoon wat in ’n droomwêreld geleef het” – waarin Satan vir hom gesê het om mense aan te val.

Die Satanjagter Kobus Jonker het ook in die saak getuig en het aan Vice gesê hy’t Morné uitgevang: Hy’t in sy dagboek geskryf oor sy planne, wat beteken daar was nie ’n demoon in hom nie, want demone beplan nie. Hulle tree impulsief op.

Daar was ook ’n kinkel wat met die Krugersdorpse afspraakmoorde aan die lig gekom het. Cecilia Steyn se nommer is op Morné se selfoon gekry. Dit het geblyk hy het berading by haar ontvang om hom van Satan te verlos.

In September 2009 is Morné tot 20 jaar tronkstraf gevonnis.