Читать книгу Driveway Divatjie - Annalise Wiid - Страница 20
ОглавлениеVergeet-my-nietjie
VERGEET-MY-NIETJIE
Diep, diep in die Rhodopi lê ’n blommedorp
waar klein blou vergeet-my-nietjies verbrysel word.
Die geur van gekneusde blare
styg op, óp, hoog bo die son,
van waar groei en genade in goue strale kom
en in my skoot kom val.
En ek verwonder my
aan die broosheid en die banggeit
en die fyn volmaaktheid van ’n blom!
Daar’s baie kere al getrap op jou – ek sien die spore lê
En terwyl ek jou hier in my arms hou,
wil ek oor en oor weer vir jou sê:
Vergeet-my-nietjie, Vader God het jou onthou
en eintlik is dit Hy wat my arms om jou vou
En Hy wil hê jy moet weet
Hy verlustig Hom
in die vryheid en die blyheid
en die goue groeityd wat nou kom.
O, Hy verlustig Hom
in jou wat blinkblou blom!!!
© Annalise Wiid op haar CD Blou Kitaar
