Читать книгу die na-dood - Breyten Breytenbach - Страница 10

woorde wat wil boek

is soos bye wat korf

nes boermense dorp toe trek

vir beskerming teen die dood

van verlore te raak sonder ’n horison

se verwysing

of voëls wat moet swerm

om die gekerm binnensmonds te hou

in binnekamergebede

wanneer daardie bye

wat aan voëls kon ontsnap

jou tong kom verangel

woorde wat boek breek oop

op soek na die geswolle stilte

van bybetekenisse

terwyl voëls en sterre hul teen die ruite

van vertolking

te pletter vlieg

en jy woord vir woord

bid-besef jy is maar net die dood

as byeboer

se bywoner in die buitekamer