Читать книгу Woud van nege en negentig vlerke - Carina Stander - Страница 5

ons het vulkane sien sluimer onder lakens sneeu

herders hoor blaas op ’n trompetskulp –

asems wasem deur die nag

as hulle die kudde uit die koue jaag

twaalf seuntjies op ’n rietboot

het ’n broosgeel bamboes gefluit –

verstom die visse gelok uit die slyk

die vlegselmeisies se voete

kon deurskynende roetes verken

al oor die bergmeer se blou

het ons oë ons hierdie keer bedrieg

of was die herders ook vulkane

kon die visserseuns soms kwik en kwaak

het die meisies geroepsing in ’n kring

het die ouvrou haar oë gesluit

maalklip op die skoot

toe sy die gekraakte kliptafel ontdek

waar God ’n slavin vra om te trou