Читать книгу Ena Murray Oordenkings - Ena Murray - Страница 82

As iemand jou op die een wang slaan, bied hom ook die ander een aan. – Lukas 6:29

Dis ’n bitter ding hierdie. Dit druis in teen alles in ons, teen ons menslike geaardheid.

Maar nou is ons nie nét mens nie. Êrens in ons is ’n siel en lê daar ’n stukkie van ons skepper ook in ons ingebou.

As mense sal ons altyd vyande op hierdie aarde hê, in dié sin dat daar altyd tot by Christus se wederkoms twee hoofgroepe mense op hierdie aarde sal wees: die kinders van God én die kinders van die Bose. En God het geweet dat daar van die begin tot die einde konfrontasie tussen hierdie twee groepe sou wees. Dis logies. Hy het ook geweet wat die optrede en houding van die kinders van die Bose teenoor die kinders van God sou wees. Hulle sal sy kinders haat, hulle vloek, hulle sleg behandel, hulle slaan, hulle besteel, hulle niks gun nie.

En toe het Hy ’n gedragskode vir sý kinders opgestel waarin Hy hulle leer hoe om hierdie aggressie reg te hanteer. Kan jý ’n beter gedragskode opstel, een wat met meer sukses bekroon sal word as dié kode van God? Sou joune dalk só gelyk het: Haat jou vyand met die haat waarmee hy jou haat. Probeer hom terug kwaad aandoen elke keer dat hy jóú kwaad aandoen. Vloek terug. Behandel hom so sleg soos hy jou behandel. Slaan hy jou, slaan terug. Besteel hom waar jy kan soos hy jou besteel.

Sien jy dan nog êrens ’n hemelpoort oopstaan?

Nee, God se gedragskode is volmaak. En terwyl jy daaraan getrou bly, doen dit met ’n innige jammerte vir jou opponent. Hy is op pad hel toe. Jy, deur die genade, nie.

Here, ek erken dis nie altyd maklik om aan u gedragskode te hou nie. Maar, Here, laat my nooit vergeet ek is op pad hemel toe nie. Amen.