Читать книгу Гөлтуран / Гультуран (на татарском языке) - Рәдиф Гаташ - Страница 4

Иске сүздән яңа мәгънә

Таптымы соң җаным? —

Теләкләрнең хуш килгәнен

Каршылыйм, дип:

– Амин!

Яратам шул иске сүзне,

Бик куана җаным,

Мин дә теләк тели калсам,

Әйтсә дустым:

– Амин!

Бүләк итте гомер миңа

Кабатланмас ямен.

Һәрчак сөеп, гашыйкларча

Яшиемче!

– Амин!

Дошман да бар.

Курыкканым:

Кара уен аның

Сизмичә, куймаммы әйтеп

Ялгышып, мин:

– Амин!

Нәрсә әйтим? – гөнаһым күп:

Күп сөйләп, азрак эшлим күк.

Гаебемне таныйм.

Башкалар да танысыннар!

Шуны көтә җаным.

– Амин!