Читать книгу Гөлтуран / Гультуран (на татарском языке) - Рәдиф Гаташ - Страница 23

Хәятта ачылып капка,

Багъка – матурлыкка баксам,

Хыял күлләренә батсам, —

Дәрткә дәрман шул булырмы?

Гөлчәчәккә якын барсам,

Чәнечкесенә кадалсам,

Җаныма җәрәхәт алсам, —

Дәвачы да ул булырмы?

Китә алмыйча шул багътан,

Үз иркемнән әсир калсам,

Күңел җәем багышласам, —

Җимешләрем мул булырмы?

Көз сулышын сизеп бер көн,

Мәңгелеккә җыенсам мин,

Багъ аңлармы актык сүзем?!

Йә, тәмам хафа булырмы?

Гөлчәчәк минсез сулырмы,

Гомер-багъ капкасын япсам?..