Читать книгу Гөлтуран / Гультуран (на татарском языке) - Рәдиф Гаташ - Страница 38

Ян әле син! Дөньяга без

Янар өчен яралган.

Яз! Рух каләмең Хактан бит —

Язар өчен җан алган!

– Бар да булыр, вакыт килер,

Ашыктырма, Гаташым!..

– Ашыкмыйча ни хәл итим,

Гомер уза, җанашым…

Көл әле! Синдәйләр җирне

Ямьләр өчен яралган:

Бәлки, Кояшның үзеннән

Кыз күкрәге җан алган?!

– Күңел-касәм тулы сагыш,

Онытылсын, Гаташым…

– Яшьлекнең һәр халәте – җыр,

Кадерен бел, җанашым!

…Бак күккә! Юккамы Кеше

Йолдызга тиң яралган?

Бәлки, шунда кайтасы бар, —

Без бурычка җан алган!

– Җиргә инде күп кат килеп

Киткәнмендер, Гаташым!

– Соң тапкыр Күккә ашканда

Бергә булыйк, җанашым!