Читать книгу Гөлтуран / Гультуран (на татарском языке) - Рәдиф Гаташ - Страница 32

Кыз хыялы! Сәер уйлар, серле йөк…

Иделдән диңгез ягына килдең ник? —

Кайсы кәрванның нык, чыдам дөясе

Илтте иңендә бай җаның дөньясын?

Атаклы чал Хәзәрдә бит чылатып,

Еладыңмы аннан, комына ятып?

Җир маеннан чыраг кабызган шәһәр

Яшьлегеңә булдымы калым-мәһәр?

Уен идеме, туеңмы ул кичләр?

Гомереңне яктырткан айлы хисләр…

Азак сагынгансың, бәлки, кәрваннар

Алырга сине – илеңнән барганнар.

Ни белән ул баеган яшь җаның тик? —

Таумы анда? Кәрванчыга авыр бик…

– Кайта, – дисең, – төрки шигырь гөлләре,

Гел чәчәктә, мәңге тере үзләре.

Шул гөлләрнең исе тансык Иделгә:

Мең-мең еллар яшәсеннәр илемдә!

…Сәяхәт… йә сәясәтме? Риваять —

Җаныңның бер сәфәреннән хикәят.

Хыялың бит гел Ай тулган чакларда

Шунда дәшә – сүнмәгән учакларга.