Читать книгу Гөлтуран / Гультуран (на татарском языке) - Рәдиф Гаташ - Страница 41

Илаһым! Бу җанымны үзең

Тугры юлга салса идең! —

Ул юл – шул: йолдызымнан гел

Аерылмыйча янса идем!

Хаҗда, Кәгъбә ташын үбеп,

Ләйлә өчен ауруын —

Сөюен мәңгелек ит, дип,

Мәҗнүннең ялваруын

Исеңә төшерәм… Минем хәл

Шуңа тиң, Тәңрем, бүген.

Сәҗдәгә егылсам, хисем

Әллә ул изге түгел?

Әүвәл без – Син яраткан җан,

Аннан соң – сөю колы…

Мәхәббәткә юл уза тик

Бөек әмерең аркылы…

Кичер дә уем, ярлыка

Гөнаһлы гашыйк җанын.

Ялвара сиңа… Һәм ярына —

Догасы ихлас аның!

Илаһым! Һәр дөньяңда җан

Ак юлыңда калса иде,

Иманлы яшәп, пакь сөеп,

Ахыргача янса иде! —

Тугры юлдан барса иде!