Читать книгу Гөлтуран / Гультуран (на татарском языке) - Рәдиф Гаташ - Страница 7

Саксыз тию ярамыймы чын-чыннан?

Бәллүр касә!

Таныйм ласа чыңыннан!

Затлы бәллүр!

Зеңли, җырлый ул әнә,

Путасында утлы күзме? – Сүз яна…

«Шәраб эчмәгез сез миннән, гашыйклар:

Җанда сезнең ачы-татлы сагыш бар,

Сезнең өчен дәва – бәллүр чыңлавы,

Сусаганны кайтарачак чынлап ул!

Түгелмен мин Җәмшид, Хәйям касәсе,

Төбемдә, бел, Мәҗнүн-Кайс күз яше, —

Анда Ләйлә, Шириннәрнең моң, уты,

Әбелхәят түгел, мәхәббәт суты…

Бәллүр тулы, түгәрсез, кагылмагыз, —

Сүзсез моңымны ерактан тыңлагыз!

Булырсыз хуш, исереп шул чыңымнан:

Ихлас йөрәкләргә мирас җырымнан…»