Читать книгу Гөлтуран / Гультуран (на татарском языке) - Рәдиф Гаташ - Страница 9

Җан дусларым, кардәшләр, милләттәшләр!

Тауар-ишләр, табындаш, шигырьдәшләр!

Гасыр сөреме сөрмәләгән чал кашлар,

«Әтәч яшьлек» масайткан, гаярь яшьләр!

Яшә, нәслем, бавырым, каумем, димен,

Сезгә шушы хитабым – хатым минем! —

Барчабызны айнымаслык исертсен

Бары ирек хисе, милләтем, димен.

«Милләтче» йә «милләтпәрвәр» дисеннәр,

Бәхет ул – милләткә бәйле исемнәр.

Ничә мең ел канда, җанда үлмәгән

Халык исме байрак бүген – күрсеннәр.

Җырым! Сине шул ышаныч тудырсын,

Халкыңнан аерылу бары куркытсын.

Иң бөек, зур чынлык шушы – дөньяда! —

Шуны аңламаган ирне җир йотсын!