Читать книгу Die ewigheid in my hart - Barend Vos - Страница 24

Die enigste God

Soos altyd, Here, sing ek hierdie lied

vanuit die veiligheid van my skuilplek.

Soos altyd staan ek vas en stewig by U,

en vanaf hierdie stoere rots kan ek roep:

“Julle wat ander gode dien – hoor tog hier!

Daar is niks goeds aan wat julle doen nie;

dit gaan vir julle net ellende bring.

Luister na my – ek praat uit ondervinding …”

Ja, Here, U weet tog dat ek

my geluk ook by daardie spul

gaan soek het. Hoe skaam ek my

nie oor dié flirtasie met die gode nie!

Ek het mos daar gaan kuier,

gou-gou gaan besoek aflê ...

en toe oorweeg om daar te bly.

Alles lyk so goed by hulle,

so aantreklik, so aanloklik.

Totdat jy die prys bereken …

“Hoor tog, julle wat dink

om daardie pad te kies:

Ek roep die Here se Naam uit.

Ek roep die enigste God aan –

en dit is nie moeilik nie,

want Hy hou my altyd vas.

Daardie sogenaamde gode

waaraan julle so verkleef is,

hulle gaan julle los – en dan?”

Weg met hulle!

Ons goed en bloed

behoort aan die Here,

Hý is ons skuilplek.

U is inderdaad die enigste God

wie se Naam noemenswaardig is.