Читать книгу Sürgün - - Страница 34

Ölçü vahidləri dəyişilməli,

məsələn, zamanı saatlarla deyil,

iztirabla ölçməliyik,

ömrümüzü çəkdiyimiz əzabla ölçməliyik,

santimetr yaramır adamın boyuna,

qamış da cəmi bircə dəfə kara gəlir,

o da sən olmayanda,

olanları olmazlarla,

olmazları olanlarla ölçməliyik,

qismətin də öz yeri var,

nisbətin də öz yeri var,

adamın boyu ağlın göstəricisi olsun gərək,

qəlb də uydurmadır, könül də,

gecə-gündüz işləyən ürəkdir, ürək,

ürəyin ritmi saatdan dəqiqdir,

zamanın nəbzindən safdır,

ürək belə əclafdır,

məsafələr ölçülməməli kilometrlə, millə,

ən uyğunu həsrətdir,

fərqini bilən varmı nadanların kamillə,

qürbət elə qürbətdir,

başın ölçüsünü papaqla deyil,

ağılla ölçməliyik,

içimizdəki dərdi ağırla ölçməliyik,

batmanla ölçməliyik,

torpağın qüdrətini kətmənlə ölçməliyik,

gözlərin uzağı görməsi şərt olmamalı,

şərt nəyi necə görməsidir,

gündüzü gündüz,

gecəni gecə görməsidir,

sürəti işıqla ölçür alimlər,

bir eşqin yolunda hamımız dəliyik,

hamımız işığa can atmalıyıq,

hamımız işığa çevrilməliyik…