Читать книгу Sürgün - - Страница 38

Qapısı bağlıdır, pəncərəsi kor,

bu dünya bəzəkli imarətimdir,

kədərdən, acıdan, qüssədən, qəmdən,

bir az da sevincdən ibarətimdir.

Nə vaxtdır dad bilmir dişim, damağım,

bu üzdən açılmır qaşım, qabağım,

hərdən arı kimi vızıldamağım,

sözü bal eyləyən qiraətimdir.

Çətin ki, təzədən insan yoğrulam,

ya ki, yaradılam, ya ki, doğulam,

andıma, əhdimə nökərəm, qulam,

sanmayın bu qəlbsiz itaətimdir.

Eşq qibləm, qibləyə üz tutmaq yazım,

bir sübh azanıdır nəğməm, avazım,

sevilmək orucum, sevmək namazım,

məhəbbət ən gözəl ibadətimdir…