Читать книгу Sürgün - - Страница 36

Yağış yağmırsa, yağdır,

günəş çıxmırsa, çağır,

haray söylə, ay haray,

göydə görünmürsə ay,

gördün əsmir küləklər,

silkələ ağacları,

səp bütün küçə boyu,

səp, ağarmış saçları,

qoy desinlər yağır qar,

yerə çökür qarğılar,

ağ bəzənmiş çiçəklər,

ətir saçmır, qəm eləmə,

ətir saç bu aləmə,

qoy bircə sel olmasın,

göz yaşın yanağında,

buza dönməsin, dönməsin,

gülüşlər dodağında.

Bir gün ağac olmasan,

kölgən olarmı, olmaz,

vətəndaş olmayınca,

ölkən olarmı, olmaz,

ən uzun yol özünsən,

ən kəsə ömür səndə,

çox yaşasan görərdin,

necə dönür qızıla,

söz səndə, dəmir səndə.

Şimşək çaxmır, özün çax,

ildırımtək gurulda,

azadlığa can atmaq

həvəsi olmaz qulda,

özün yarat özünü,

bəndəsən, ya asisən,

bil ki, bu təbiətin,

sən də bir parçasısan.