Читать книгу Өрө тыгар хатыҥнар. Сочинения. Том 3 - - Страница 11

Түннүк нөҥүө хаар түһэр,

Кыһын кэллэр кэлэн иһэр…

Хайдах эрэ кыстаан эрэр

Кымырдаҕас эрэйдээх?..

…Күһүн этэ. Кыстык дьиэҕэ

Көһөрөр киһи күүтэн,

Хагдарыйбыт тэлгэһэҕэ

Күн уотугар көхсүбүнэн

Сыламныы олорон мин

Соһуччу көрө түспүтүм:

Адьас атаҕым анныгар,

От-мас сыыһын быыһыгар

Биир быыкаайык кымырдаҕас

Мөдөөттүк мөхсүбүтүн…

Саба үктээн кээһиэхпин

Санаам миэнэ буолбатаҕа:

«Салҕаабатах» да иһин,

Сир өтүө суох быһыылааҕа…

Үөн-көйүүр ууһаан, мустан,

Ордуутугар нухарыйар,

Барамай эрэ барыта

Балаҕаныгар хаптайар,

Хаҕыс тыал хотуттан үрэр,

Хаар хаһыҥ түһэр кэмэр

Аһаҕас халлаан анныгар

Удьуор үлэһит аатырар

Өй-мэйии кымырдаҕас

Суос-соҕотоҕун быстан,

Сордоммута-муҥнаммыта, —

Сүрэхпин долгуппута!

Ким билиэй кымырдаҕас

Кыһалҕатын, дьылҕатын? —

Оргулуттан үүрүллүбүт

Улуу муҥун, буруйун…

Эбэтэр, кустуу муммут

Огдолуйбут олоҕун…

Биитэр, кырдьан, ыалдьан, кыаммат

Босхоҥ буолбут муҥун дуу?..

…Түннүк нөҥүө хаар түһэр,

Кыһын кэллэр кэлэн иһэр!..

Хайдах эрэ кыстаан эрэр

Кымырдаҕас эрэйдээх?..