Читать книгу Гөлтуран / Гультуран (на татарском языке) - Рәдиф Гаташ - Страница 47

Сәламнәрем сезгә – өч кыз туганга!

Сандугач чакырып, таңнар туганда,

Кайсыгыз йокысыз моңая анда?

Кайсыгыз тәрәзә ачкан дөньяга? —

Сәламнәрем сезгә – өч кыз туганга!

Сандугач уяткан таң сызылганда

Яз сулышын тоясыздыр дөньяда.

Бакчагызда нинди яктылык анда? —

Туй күлмәге киеп, алмагачлар да

Тәрәзәгезгә киләме таңнарда?

Кайсыгыз йокысыз моңая анда?

Яшьлек күзләре язларда уяу ла.

Күзләрдән күчә җаннарга сорау да,

Җавабы табылыр, бәлки, бу айда —

Гөлгә охшап, җан ачылган язларда.

Кайсыгыз тәрәзә ачты дөньяга?

Керә матурлык – гүяки нур ага.

Миндә дә, ниһаять, илһам уяна! —

Чакыру авазы ишетәм юлларда,

Миндә дә бит бар тәрәзә дөньяга!

Бу – рәхмәтем минем өч кыз туганга,

Юлым беркөнне сезгә тап булганга.

Шул бәхеттән исереп айнымаганга,

Гаташ тагын гашыйк булды дөньяга,

Ә хисләре сезгә – өч кыз туганга!