Читать книгу Гөлтуран / Гультуран (на татарском языке) - Рәдиф Гаташ - Страница 48

Ниндидер төпсез коеда калганмы

Яшьлек ядкярең – бәһасез балдагың?

Төштең, эзләп, нинди уй чоңгылына,

Алып чыгыйм сине, кереп анда мин?

Табылырмы җуйган балдагың кабат?

Йөзеңә көләч яз нуры кайтырмы?

Яшерен сереңә – күңелеңә тимичә,

Яратырга телимен син матурны.

Оныттырыйм – дәва булыйм яраңа,

Гашыйк җыры биеккә дәшсен сине.

Әйт, ничегрәк коткарыйм уй-упкыннан,

Кайтарыйм синең шат, гамьсез хисеңне?

Ниндидер тирән коеда калган күк

Әллә күңелең синең, әллә балдагың —

Табармынмы? Бүген мин ул упкында

Аздан гына үзем торып калмадым.

Яшьлегем яктысын күрдем анда мин!