Читать книгу Su üzərində bahar - Rəfail Alı oğlu Tağızadə - Страница 58

Allah,

çəkəcəyim dərdi gəl,

sən mənim özümə ver.

Başqasına dərd verib

məni dərdə bələmə.

Doğma bilmir, yad bilmir,

dərdin səpir sinəmə,

unuduram dərdimi,

üstümə dərd ələmə.

Sevincə ha qaçıram

qəm üstünə qəm gəlir,

bir ömür borc ödədim,

sonda hər şey kəm gəlir.

Mənim olan dərdimin

dərmanı tamam yaddı,

ha dərdimə ad qoydum —

qalan sən qoyan addı.

Allah,

çəkəcəyim dərdi gəl,

sən mənim özümə ver.

Başqasına dərd verib

məni dərdə bələmə.

Unudaram dərdimi,

üstümə dərd ələmə.