Читать книгу Dağlar - Aşıq Alqayıt - Страница 17

Sənə görə yaman dəymədüşərəm,

El dəysin xətrimə, təkcə sən dəymə.

İldırım kükrəsin başımın üstə,

Sel dəysin xətrimə, təkcə sən dəymə.

Qəriblik görmüşəm, neçə dağ-aran,

Ayrılıq könlümü eyləyib viran.

Bir ömrü yarıya bölüb aparan,

İl dəysin xətrimə, təkcə sən dəymə.

Şahidi olmuşam hər toyun, yasın,

Qoy, məni qüssələr, qəmlər çulğasın.

Qönçələr ah çəksin, çiçək qarğasın,

Gül dəysin xətrimə, təkcə sən dəymə.

Alqayıt heç kəsdən inciməz, inan,

Bakı nalə çəkib, inləsə Şirvan.

Gəncə, Təbriz, Tehran, Qarabağ, Muğan,

Mil dəysin xətrimə, təkcə sən dəymə.