Читать книгу Ena Murray Oordenkings - Ena Murray - Страница 26

Hy is mishandel, maar hy het geduldig gebly, hy het nie gekla nie. – Jesaja 53:7

Ons kla so graag. Ons is so gou om te vertel wat ons hinder, wat ons ontevrede stem en hoe sleg dit met ons gaan. En ons word so gou ongeduldig as dinge nie verloop soos ons dit wil hê nie.

Die meeste van ons het ’n negatiewe houding aangekweek. Geen wonder dat dit mense na moord en selfmoord dryf nie.

Ek sit eendag in een van ons stede in ’n motor en wag en kyk toe na die voetgangers wat op die sypaadjie verbykom. Toe my man terugkom, vra hy: “Iets snaaks gesien?” “Ja,” antwoord ek. “ ’n Stad vol mense met lang gesigte. Daar was net een wat ’n goedige uitdrukking in die oë en ’n klein glimlaggie om sy mond gehad het. Net een.”

Dis die waarheid. Ek het langer as ’n uur daar gesit en alle soorte het op die sypaadjie by my verbygekom. En almal was haastig. Nie een van hulle was bewus van die ander om hulle nie. Elkeen was net te besig met sy eie ding, en te oordeel na die uitdrukking in die oë, besig met sy eie probleme. Net die een gehawende ou man, met swaarkry oor sy hele wese geskryf, het rustig aangestap gekom, en toe ons mekaar sien, het hy geglimlag.

Kan ons nie ’n bietjie geduldiger wees nie? ’n Bietjie minder kla? ’n Bietjie meer glimlag nie? ’n Bietjie meer tyd hê om om ons te kyk en dinge én mense raak te sien nie? Want ons het alle rede om te glimlag. Ons het alle rede om geduldig en verdraagsaam te wees; alle rede om nie te kla nie; alle rede om blymoedig te wees, want Jesus het vir ons aan die kruis gehang en só die hemel vir ons oopgemaak.

Here, leer my vandag om ’n blymoedige kind van U te wees. Amen.