Читать книгу Ena Murray Oordenkings - Ena Murray - Страница 32

Pas op dat niemand julle van Hom af wegvoer deur teorieë en argumente wat misleidend is nie. Dit is dinge wat berus op die oorlewering van mense, op wettiese godsdienstige reëls en nie op Christus nie. – Kolossense 2:8

Deesdae word alles mos wetenskaplik ontleed. Daar is kwalik iets meer oor, selfs in verband met die heelal, wat nie verklaar kan word nie, waarvan die oorsprong en ontstaan en bestaan nie deur geleerde, slim mense ontrafel, ontleed en uitgelê word nie. Misterie is iets wat byna heeltemal verdwyn het.

Daar is nie meer ’n onderwerp onder hierdie son waaroor daar nie geargumenteer word nie; niks onder en anderkant hierdie son waaroor daar nie geleerde en wetenskaplike teorieë bestaan nie. Selfs oor die Godheid en sy almag en sy Woord bestaan daar verskillende en dikwels botsende teorieë. ’n Ieder en ’n elk argumenteer daaroor – van die leek tot by die man wat homself as ’n gesaghebbende beskou.

Ek wonder dikwels hoe pateties slim ons – wetenskaplikes, teoloë en ons gewone mense – nie vir God moet voorkom nie. Met watter heilige bejammering in die hart Hy na ons slim en geleerde praatjies luister. En met watter heilige toorn Hy toekyk hoe die mens homself al meer aan God en sy almag wil gelykstel.

God het geweet dat so ’n tydperk sou aanbreek waarin teorieë en selfs wetenskaplike argumente aangevoer sou word om sy kinders te verwar en selfs van Hom afvallig te maak. Dink maar hoe daar al meer vandag ’n vraagteken geplaas word agter die waarheid van die Bybel. Hy het vroegtydig gewaarsku.

Here, help dat die mens en sy slimheid my nooit meer sal beïndruk as U nie, en dat geen teorie of argument van hierdie wêreld my sal wegvoer van u waarheid nie. Amen.