Читать книгу Ena Murray Oordenkings - Ena Murray - Страница 29

… “Die dogter is soos die ma. Jy is jou ma se dogter.” – Esegiël 16:44, 45

Watter groot, watter byna skrikwekkende verantwoordelikheid is ouerskap!

’n Mens word koud as jy net daaraan dink, want sekerlik moet jy weet dat die kind wat God aan jou toevertrou het, ook eendag van jou hand geëis gaan word.

Baiekeer hoor jy ’n ouer sê: Ek weet nie hoekom my kind hierdie of daardie verkeerde ding gedoen het nie. Hy of sy is nie so grootgemaak nie. My seun wéét dis verkeerd om dit of dat te doen. Ek kan nie glo dat my dogter haar so kon gedra nie.

Maar staan jy werklik so onskuldig teenoor hierdie dinge? Woorde wek, maar voorbeelde trek, sê die ou spreekwoord.

Jou kind vir wie jy daarop betrap dat hy leuens vertel … het jy nie miskien vir hom geleer lieg nie? Daardie wit leuens wat so maklik vertel word … Jou seun wat daarop betrap word dat hy steel … het jy nie dalk aan hom die voorbeeld gestel deur in die verlede dinge vir jou toe te eien wat jy, én hy, geweet het jou nie toekom nie? Jou dogter wat skielik in ’n swak tipe meisie ontaard … loop jóú spore kuis en reguit agter jou aan, of is sy nie miskien maar net “ma se dogter” nie? Moet jy nie miskien, wanneer jy die voorbeeld wat jy gestel het, in oënskou neem, bely nie: Die dogter is soos die ma, die seun soos die pa?

Ag Here, help my as ouer om my spore só te trap dat my kind in veiligheid en met trots en selfrespek daarin kan volg. Dit kan net gebeur as U in u genade my daartoe help. Amen.