Читать книгу Ena Murray Oordenkings - Ena Murray - Страница 30

Wees altyd bly … Wees in alle omstandighede dankbaar, want dit is wat God in Christus Jesus van julle verwag. – 1 Tessalonisense 5:16, 18

Dis ’n tragedie dat ’n mens vandag meesal nie meer die kind van God en die kind van die duiwel uitmekaar kan ken nie. Jy moet baiekeer raai – en baiekeer raai jy verkeerd.

Blymoedigheid is ’n kenmerk, ’n identiteitskaart, van die kind van die Here. Maar hoe lyk ons? Ons loop met lang gesigte rond. Ons sien net die donker kant – in plaas daarvan dat ons jubel en juig omdat ons kinders van die almagtige God is!

Wanneer omstandighede nie gunstig is nie, word ons die kinders van die duiwel gelykvormig. Dan is daar geen onderskeidingsteken nie. Ons gaan in stof en as, asof ons net so reddeloos ronddobber soos hulle wat geen Stuurman aan boord het nie.

Op ’n klein dorpie was daar ’n ou moeder. Sy het haar identiteitskaart as kind van God altyd by haar gedra. Hoewel sy oud en sieklik en arm was, het blymoedigheid en dankbaarheid haar bestaan omglans. Hoe vol pyn ’n nag ook was, watter beperkinge die ouderdom ook al op haar gelê het, watter gebrek sy aan lewensmiddele ervaar het, haar antwoord aan almal wat gevra het hoe dit gaan, was altyd: “Dit gaan goed. God is so goed vir my!” Op ’n dag moes die predikant haar ’n tragiese tyding bring. Haar enigste seun is in Johannesburg vermoor. Met bedenkinge het hy haar vertel. Sekerlik sou hierdie ou moeder vandag nie weer kon jubel in Gods goedheid nie! Maar toe die dominee klaar gepraat het, vou sy haar hande saam, en sê: “O, God is só goed vir my!” Hy was verslae. Hoe is dit moontlik? Sy het vir hom vertel waarom dit vir haar moontlik was: “Jy kon my vandag kom vertel het dis my seun wat ’n ander vermoor het. Maar nou vertel jy my hý is die vermoorde. Hoe goed is God vir my!”

Maak my ’n blymoedige kind van U, Here … en ’n dankbare kind onder alle omstandighede. Amen.