Читать книгу Ena Murray Oordenkings - Ena Murray - Страница 31

Maar binnekort sal ek na julle kom, as die Here wil, en dan sal ek self die verwaandes leer ken, nie volgens hulle praatjies nie, maar volgens wat hulle kan doen. Die koninkryk van God is immers nie ’n saak van praatjies nie, maar van krag. – 1 Korintiërs 4:19, 20

As ons maar meer wil doen en minder praat. As ons maar na onsself kon luister soos wat ander – én God – ons moet aanhoor. Nie een van ons staan hier onskuldig nie.

Ons vertel so graag hoe hard ons werk, wat ons nog alles wil en alles gaan doen, wat ons nog wil en gaan bereik. Maar hoeveel daarvan is ooit regtig waar? Hoeveel doen en hoeveel bereik ons werklik?

Ons ken hulle almal: daardie mense wat alles met die mond reg práát. Jy word so maklik deur hulle om die bos gelei. Eers later kom jy tot die besef: Dit was net alles woorde; die dade ontbreek.

Is jy een van hulle? Is jy een van daardie mense wat net praat en niks doen nie? Praat jy jou lewe reg? Praat jy jou foute en jou skuld weg? Praat jy net oor dié dinge wat jy wil hê sonder om daarvoor te werk? Praat jy jou in mense se goeie boekies in? Gebruik jy woorde om te kom waar jy wil wees?

Dis maklik om mense te bedrieg. Die mens wat glad van mond is, wat woorde gebruik om sy lewe en wandel in die beste voeë te lê, strooi maklik sand in ander se oë. Maar, liewe ou gladdetong, op die ou end sal jy nie geoordeel word aan wat jou tong kon sê nie. Jou dade sal vir jou moet spreek. “Want die koninkryk van God is immers nie ’n saak van praatjies nie, maar van krag.” Van dade. Nie van verwaandheid nie, maar van opregtheid.

Help my, Here, om in hierdie dag minder te praat en meer te doen. Amen.